पश्चिमसँग बढ्दो विवादका बीच रुसद्वारा शक्तिशाली मिसाइल परीक्षण
रुसको रक्षा मन्त्रालयले शुक्रबार गरिएको शक्तिशाली मिसाइल परीक्षणको भिडियो सार्वजनिक गरेको छ । ‘सेतान २’ नाम दिइएको सो ब्यालेस्टिक मिसाइल रुसको प्लेसक कस्मोड्रोम क्षेत्रबाट लन्च गरिएको सिएनएनले जनाएको छ ।
रुसको राष्ट्रिय संचारले खबर गरेअनुसार सो मिसाइलको दोस्रोपटक पनि सफल परीक्षण गरिएको छ । यसअघि डिसेम्बरमा यसलाई लन्च गरिएकोे थियो । उक्त मिसाइलसँग उत्तर र दक्षिण दुवै तर्फबाट प्रहार गर्न सक्ने क्षमता रहेको पनि खबरमा उल्लेख गरिएको छ । यो मिसाइललाई सोभियत युगका हतियारको स्थान लिन निर्माण गरिएको रुसको भनाइ छ । यसले लामो दूरीसम्म प्रहार गर्न सक्ने बताइएको छ ।
वास्तवमा यो त्यही मिसाइल हो, जसबारे गत महिना राष्ट्रपति भ्लादिमीर पुटिनले धेरै चर्चा गरेका थिए । चुनाव अभियानका क्रममा भाषण गर्दै अमेरिकी प्रतिरक्षात्मक प्रणालीले समेत यसको प्रहारलाई रोक्न नसक्ने पुटिनले दाबी गरेका हुन् । यसको जानकारीसम्बन्धी भिडियोलाई उनले राष्ट्रिय टेलिभिजनमा पनि प्रशारण गराएका थिए ।
उता राष्ट्रपति ट्रम्पले भने गत हप्तामात्र पुटिनसँग फोनवार्ता गरी दुवै देशले हतियार निर्माण कार्यक्रमलाई सीमित बनाउनेबारे छलफल गरेको बताएका थिए । तर अमेरिकाले हालै १७० रुसी अधिकारीलाई देशनिकाला गरिदिएको छ भने पूर्व रुसी एजेन्टको मुद्दामा रुस र बेलायतबीचको विवाद दिनप्रति दिन गम्भीर बन्दै गइरहेको छ । यसैबीच रुसले मिसाइल परीक्षण गर्नुले तनाव अझ बढ््न सक्ने विश्लेषकहरुको भनाइ छ । रुस विरुद्ध अहिले पश्चिमी राष्ट्रहरुले उठाइरहेको कदमलाई सोभियत युगपछिकै सबैभन्दा ठूलो कारबाही बताइएको छ ।