रेशम चौधरीलाई सपथ खुवाउन नियमावली संशोधन गरिँदै, ओलीकै सल्लाहमा चौधरीले गरेका थिए आत्मसमर्पण
काठमाडौं । टीकापुर हत्याकाण्डका मुख्य अभियुक्त रेशम चौधरी अहिले केन्द्र्रीय कारागारमा हिरासतमा छन् । १८ दिनसम्म जेलमै आमरण अनसन बसेका चौधरीलाई प्रतिनिधिसभा सदस्यको सपथ कसरी खुवाउने भन्ने विषयमा यतिखेर सरकार र राजपाबीच आन्तरिक गृहकार्य सुरु भएको छ ।
स्रोतका अनुसार चौधरीलाई प्रधानमन्त्री केपी ओलीकै सल्लाहमा अदालतमा आत्मसमर्पण गर्न लगाइएको थियो । प्रधानमन्त्रीले राजपाका नेताहरू महन्थ ठाकुर र राजेन्द्र महतोलाई अदालतमा आत्मसमर्पण गरे प्रतिनिधिसभा सदस्यको सपथ खुवाउन सजिलो हुने प्रतिबद्धता जनाएका थिए । प्रधानमन्त्रीको सो सल्लाहपछि राजपा नेताहरूले चौधरीसँग सम्पर्क गरे र रातारात जिल्ला अदालत कैलालीमा गएर आत्मसमर्पण गरे ।
तर, सपथ खुवाउने विषयमा सरकारले कुनै चासो नदेखाएपछि चौधरी जेलभित्रै आमरण अनसनमा बसे । अनसनमै बसेका बेला स्वास्थ्य अवस्था बिग्रिएपछि उनलाई काठमाडौंमा जेलमा सारियो । वीर अस्पतालमा उपचारकै क्रममा उनले आमरण अनसन छाडे । गृहमन्त्री रामबहादुर थापा बादलले जुस खुवाएर उनको अनसन तोडाएका हुन् ।
सरकारले सपथ खुवाउन आलटाल गरेपछि चौधरीले पार्टी निकट नेताहरूसँग निकै असन्तुष्टि पोखेको बताइन्छ । ‘तपाई (महन्थ ठाकुर) हरूकै कारण म यसरी जेलमा बस्नु परेको छ, नत्र म सपथ खान आरामले गाडी चढेर संघीय संसदमा प्रवेश गर्थें, यहाँ ल्याएर मलाई फसाइयो,’ चौधरीले राजपा नेताहरूसँग भनेको भनाइ उद्धृत गर्दै स्रोतले भन्यो ।
चौधरी आफूसँग रोएपछि राजपा संयोजक ठाकुर प्रधानमन्त्री ओलीसँग निकै आक्रोशित भएको बताइन्छ । सुरुमा प्रधानमन्त्रीकै सल्लाह मानेर काम गरियो, तर अहिले अलपत्र परियो भन्दै ठाकुरले चौधरीको सपथ नभएसम्म कुनै सहमति नहुने सरकारलाई चेतावनी दिएका छन् । यसबीचमा चौधरीलाई जेलमै सपथ खुवाउने हल्ला मात्र भएको बताइन्छ ।
प्रहरीले कुनै पनि हालतमा अभियुक्तलाई सपथ खुवाउन नमानेपछि प्रधानमन्त्री ओलीले प्रतिनिधिसभा नियमावली संशोधन गर्न निर्देशन दिएका छन् । टीकापुर घटनामा एसएसपी लक्ष्मण न्यौपानेसहित आठजना मारिएका थिए । सोही कारण प्रहरी चौधरीप्रति आक्रामक छ ।
सरकारले प्रतिनिधिसभा नियमावलीको धारा ९६ संशोधन गरी ‘अभियोग पुष्टि नभएसम्म सपथ खुवाउन मिल्ने’ प्रावधान राख्ने सरकारले तयारी गरेको छ ।
यसो भएमा चौधरीलाई सपथ खुवाउन बाटो खुल्नेछ । राजपा नेताहरू प्रतिनिधिसभा नियमावली संशोधन गरी चौधरीलाई सपथ नखुवाएसम्म संसद् चल्न नदिनेसम्मको रणनीतिमा लागेका छन् । संसद्ले प्रतिनिधिसभा नियमावलीको समितिमा सभापतिमा एमालेका कृष्णभक्त पोखरेललाई चयन गरेको छ । मिडिया एनपि बाट
११ चैत २०७४
