काठमाडौं, २९ फागुन । एक सातादेखि प्रधानमन्त्री केपी ओली र माओवादी केन्द्रका अध्यक्ष पुष्पकमल दाहाल प्रचण्ड निकै सकसमा परेका छन् । सत्ताको भागबन्डाको विषयमा सहमति हुन नसक्दा ओली सरकारले पूर्ण पाउन सकेको छैन । चैत ३ गते ओली प्रधानमन्त्री भएको एक महिना पुग्दैछ ।

तर, एक महिना हुन लाग्दा पनि सरकार विस्तार हुन नसक्नुमा ओली र प्रचण्ड दुवै मुख्य कारक मानिएको छ । स्रोतका अनुसार उपराष्ट्रपतिको दौडमा राजपा संयोजक महन्थ ठाकुर पनि सामेल भएपछि उपराष्ट्रपतिको निर्वाचन कहिले गर्ने भन्ने टुंगो लाग्न सकेको छैन ।

प्रधानमन्त्री ओली मंगलबार राष्ट्रपतिको निर्वाचनपछि बुधबार नै सरकार विस्तार गर्ने तयारीमा थिए । तर, संघीय समाजवादी फोरम र राजपा पनि सरकारमा सामेल हुने भएपछि कसरी मन्त्रालयको भागबन्डा टुंगो लगाउने भन्ने सकसमा ओली र प्रचण्ड छन् । दुवै संघीय समाजवादी फोरमलाई मात्र सरकारमा सामेल गर्ने मनस्थितिमा थिए । तर, केही समयअघि नेपाल भ्रमणमा आएकी भारतीय विदेशमन्त्री सुषमा स्वराजको सुझावअनुसार महन्थ ठाकुर र राजेन्द्र महतोको कसरी व्यवस्थापन गर्ने भन्नेमा प्रधानमन्त्री ओली चिन्तित देखिएका छन् ।

निर्वाचनअघिसम्म आफ्ना विरोधी रहेका माओवादी केन्द्रका अध्यक्ष प्रचण्ड, फोरम अध्यक्ष उपेन्द्र यादव, राजेन्द्र महतो र महन्थ ठाकुरलाई ओलीले आफू वरिपरि ल्याइसकेका छन् । सभामुखको निर्वाचनलगत्तै प्रधानमन्त्री निवास बालुवाटारमा ओली, प्रचण्ड र ठाकुरबीच भएको भेटवार्तामा प्रधानमन्त्री ओलीले सरकारमा सहभागी हुन राजपालाई आग्रह गरेका थिए । सोही भेटमा ओलीले उपराष्ट्रपति बन्न र सरकारमा सहभागी हुन प्रस्ताव गरेका थिए । ठाकुरले ‘कतिजना मन्त्री पठाइदिउँ त’ भनेपछि अहिलेसम्म ओली र प्रचण्डले राजपालाई सरकारमा सहभागी गराउने कि नगराउने भन्ने निर्णय गर्न नसकेको स्रोतले बतायो ।

वर्तमान राष्ट्रपति विद्यादेवी भण्डारीलाई नै दोस्रो कार्यकालका लागि दोहो¥याउने वाम गठबन्धनको सहमतिपछि उपराष्ट्रपति नन्दबहादुर पुन ढुक्क थिए । तर, यतिखेर उनमा कतै महन्थ ठाकुर उपराष्ट्रपति भइदिने हुन् कि भन्ने चिन्ता र छटपटी सुरु भएको छ । भारतले महन्थ ठाकुरको व्यवस्थापन कतै न कतै गर्न प्रधानमन्त्री ओली र माओवादी केन्द्रका अध्यक्ष प्रचण्डलाई आग्रह गरिरहेको बुझिएको छ । सोही कारण राजपाले ओलीलाई प्रधानमन्त्रीमा निसर्त विश्वासको मत दिएको हो ।