रुस सङ्ग भए जस्तो शक्तिशाली क्षेप्यास्त्र अरु देश सङ्ग छैन-पुटिन
रुसी राष्ट्रपति भ्लादिमिर पुटिनले आफ्नो देशसँग अपराजेय क्षेप्यास्त्र रहेको दाबी गरेका छन्। त्यस्तो क्षेप्यास्त्र अन्य कुनै पनि देशसँग नभएको र संसारको जुनसुकै स्थानमा पुग्नसक्ने दाबी पनि पुटिनले गरेका छन्।
उनले आफ्नो देशसँग भएको क्षेप्यास्त्र ‘कम उचाइमा उड्ने, हत्तपत्त पत्ता लगाउन नसकिने, आणविक हतियार बोक्न सक्ने, असीमित दूरीसम्म पुग्न सक्ने र अनुमान गर्न नसकिने मार्ग अपनाउने हुनाले त्यसलाई रोक्न नसकिने तथा वर्तमान र भविष्यमा बन्नसक्ने क्षेप्यास्त्र प्रतिरोधी प्रणालीले हराउन नसक्ने’ भएको दाबी गरे।
रुसको राष्ट्रपतीय निर्वाचनभन्दा १७ दिनअघिको अन्तिम सम्बोधनमा पुटिनले आफ्नो आगामी कार्यकालका लागि महत्वपूर्ण नीतिगत ढाँचा अघि सारेका छन्।
मार्च १८ मा हुने निर्वाचनका लागि पुटिनसँग अन्य ७ उम्मेदवारले प्रतिस्पर्धा गर्दैछन्। यद्यपि तिनलाई सहजै पन्छाउँदै पुटिन चौथो कार्यकालका लागि राष्ट्रपति बन्ने अपेक्षा गरिएको छ।
पुटिनले अहिलेसम्म चुनावी अभियानमा सक्रियता पनि देखाएका छैनन्।
बिहीबार दुवै सदनलाई संयुक्त रुपमा सम्बोधन गर्दै पुटिनले आगामी ६ वर्षमा गरिबको संख्या आधा घटाउने कार्यक्रम अघि सारे। उनका अनुसार सन् २००० मा रुसमा ४ करोड २० लाख मानिस गरिबीको रेखामुनि रहेको र अहिले २ करोड मानिस गरिबीको रेखामुनि रहेको बताए। उनले जापान र फ्रान्सको औसत आयुलाई पछि पार्ने पनि बताए।
सिरियामा रुसको भूमिकाबाट देशको रक्षात्मक क्षमता बढेको देखिएको दाबी गर्दै पुटिनले आगामी केही महिनामा क्रिमियासँग जोडिने पुल पनि सञ्चालनमा आउने बताए।
एजेन्सी
