मगरात’ पहिचान दिन मगर संघको माग

काठमाडौं : नेपाल मगर संघले मगरात पहिचान दिन माग गरेको छ। संघले आइतबार पत्रकार सम्मेलन गरी प्रदेश ४, ५ र ६ प्रदेशलाई मगरातको पहिचान दिएर नामकरण गर्न माग गरेको हो।

फागुन १५ गतेदेखि काठमाडौंमा सुरु हुने २६औँ राष्ट्रिय सम्मेलन तथा मगरात सम्मेलनको बारेमा जानकारी दिन आइतबार राजधानीमा आयोजित पत्रकार सम्मेलनमा संघका अध्यक्ष नवीन रोका मगरले तीनवटा प्रदेशलाई मगरात पहिचानसहित नामकरण गर्नुपर्ने बताए।

अध्यक्ष रोकाले मगर जातिको आदिभूमिलाई तीन चिरा पारिएको भन्दै एउटै क्लस्टरमा ल्याएर आठौँ प्रदेश बनाउनुपर्ने संघको पहिलो माग रहेको बताए। मगरात क्लस्टरलाई मिलाएर एउटै प्रदेश बनाउन नसकिने हो भने प्रदेश ४ लाई मगरात–तमुवान, प्रदेश ५ लाई मगरात–थारूवान र प्रदेश ६ लाई मगरात–खसान नामकरण गर्नुपर्ने बताए। ‘हाम्रो पहिलो माग मगरात भूमिको क्लस्टरसहितको मगरात प्रदेश हो’, उनले भने, ‘त्यसो हुन नसके तीनवटै प्रदेशलाई मगर समुदायको पहिचान आउने गरी नामकरण गर्नुपर्छ।’

मगर संघले मगर भाषालाई राज्यको सबै तहमा सरकारी कामकाजको अधिकारसहित राष्ट्रिय भाषाको मान्यता दिनुपर्ने, लखन थापामगरलाई राज्यले प्रथम शहीदको सम्मान दिनुपर्ने, मगर प्रथाजनित कानुनहरूलाई संवैधानिक मान्यता प्रदान गर्नुपर्ने माग राखेको छ। ‘हाम्रा एजेण्डामाथि राष्ट्रिय सम्मेलनमा गम्भीर छलफल हुन्छ र हामी हाम्रा माग पूरा गराउन आन्दोलन अगाडि बढाउँछौँ’, संघका महासचिव ज्ञानेन्द्र पुनले भने।

संघले ‘पहिचानसहितको संघीयता र मगरात स्वायत्त प्रदेश स्थापनाका लागि संविधान संशोधन : सामाजिक न्याय तथा पूर्ण समानुपातिक प्रतिनिधित्वको पक्षमा २६औं राष्ट्रिय सम्मेलन’ भन्ने नारा तय गरेको छ।

पत्रकार सम्मेलनमा संघले फागुन १५, १६ र १७ मा राष्ट्रिय सम्मेलन हुने, सम्मेलनको उद्घाटन फागुन १५ गते टुँडिखेलमा हुने र बन्द सत्र गंगबुमा हुने जानकारी दिएको छ। सम्मेलनमा ६९ जिल्ला शाखा, ६ भ्रातृ संगठन, वैदेशिक शाखालगायतबाट ५०० प्रतिनिधि सहभागी हुने जनाइएको छ।

मगर संघको स्थापान २०३९ फागुन १५ गते भएको थियो। सोही दिनलाई मगर समुदायले मगर दिवसको रूपमा मनाउँदै आएको छ |

थाहखबर |