च्याब्रुङको धुनले फिदिम बजार गुञ्जायमान
मातृभाषी दिवसको अवसर पारेर लिम्बू जातिको मौलिक बाजा केःलाङ् (च्याब्रुङ नाँच) को संरक्षणका लागि आयोजित ‘अन्तर्राष्ट्रिय केःलाङ् महोत्सव’ च्याबु्रङका धुनसँगै ७ देखि ९ फागुनसम्म पाँचथर सदरमुकाम फिदिम च्याब्रुङको धुनले गुञ्जायमान बन्यो ।
महोत्सवको उद्घाटन प्रदेश–१, का प्रमुख डा. गोविन्द तुम्बाहाङले गरेका थिए ।
महोत्सवमा ५ सय बढी कलाकारले च्याब्रुङ प्रस्तुत गर्दा छुट्टै रौनकता छाएको थियो । महोत्सवमा सिक्किमका तीनसँगै पाँचथर, ताप्लेजुङ, इलाम, झापा, सुनसरी, धनकुटा र तेह्रथुमका २२ वटा केःलाङ् समूह सहभागी थिए ।
‘लिम्बू जातिले विवाहकर्म, नयाँ घरमा सर्ने क्रममा र विभिन्न मेला, पर्व र उत्सवहरूमा केःसाम् गाउँदै हार्दिकतापूर्वक नाँच्ने केःलाङ् पछिल्लो समय लोप भएर जान लागेको छ । त्यसको संरक्षणको सन्देश दिन महोत्सव आयोजना गरिएको हो ।’ महोत्सव मूल समारोह समितिका अध्यक्ष मनकुमार केरुङले बताए ।
लिम्बू गायिका मनु नेम्बाङको पालामी गीत र नायिका बबिता फोम्बोको नृत्यले महोत्सवलाई छुट्टै रंग दिएको थियो ।
बुधबार केःलाङ् र केःसाम्को विषयमा छलफल र वहससहित महोत्सवको समापन भएको छ ।