इजरायल र प्यालेस्टाइनबीचको सम्बन्ध ‘सहन नसकिने’ अवस्थामा , प्यालेस्टाइन द्वारा शान्ति सम्मेलनको प्रस्ताव
काठमाडौं । प्यालेस्टाइनका राष्ट्रपति मोहोम्मद अब्बासले इजरायलसँगको लडाइ अन्त्य गराउन अन्तराष्ट्रिय शान्ति सम्मेलनको प्रस्ताव राखेका छन् ।
संयुक्त राष्ट्र संघको सुरक्षा परिषदलाई सम्बोधन गर्दै उनले इजरायल र प्यालेस्टाइनबीचको अवस्था ‘सहन नसकिने’ भइसकेकाले विवाद अन्त्य गराउन अत्यन्तै जरुरी भएको बताएका हुन् । अर्कोतर्फ इजरायलका राजदूतले भने प्रत्यक्ष वार्तापछि मात्र यस समस्याको समाधान हुने बताएको बीबीसीले जनाएको छ ।
यसअघि दुईदेशबीच शान्ति सम्झौता अघि बढ्ने सम्भावना रहेपनि अमेरिकी राष्ट्रपति ट्रम्पको निर्णयले सबै प्रक्रिया भङ्ग पारिदिएको बताइएको छ ।
ट्रम्पले जेरुसेलमलाई इजरायलको राजधानी घोषित गरेपछि इजरायल र प्यालेस्टाइनबीचको विवाद भयानक हिंसामा परिणत हुँदा थुप्रै नागरिकाले ज्यान गुमाएका थिए ।
यसपछि आक्रोशित प्यालेस्टाइनले अमेरिकालाई मध्यपूर्वी क्षेत्रको शान्ति प्रक्रियामा सहभागी नगराउने निर्णय सुनाएको हो ।
इजरायल र प्यालेस्टाइनबीच जेरुसेलम सबैभन्दा प्रमुख मुद्दा रहेको बताइन्छ ।
पछिल्लो २५ वर्षदेखि इजारायल र प्यालेस्टाइन सहमतिको नजिक आएर पनि शान्ति स्थापनामा सफल हुन सकेको छैन । त्यसैले अबे संयुक्त राष्ट्र संघको सहकार्यमा अन्तराष्ट्रिय शान्ति सम्मेलनको आयोजना गर्न राष्ट्रपति अब्बासले प्रस्ताव गरेका हुन् ।
उता इजरायलले भने प्यालेस्टाइनलाई प्रत्यक्ष वार्ता गर्नबाट पन्छिदै अन्तराष्ट्रिय समुदायसँग मात्र सम्पर्क राख्ने गरेको आरोप लगाउँदै आएको छ ।
यसबारे इजरायलका राजदूत ड्यानी डेनोनले भने, ‘आज फेरि पनि राष्ट्रपति अब्बासले रमल्लाबाट जेरुसेलमसम्मको १२ मिनेटको बाटो छाडेर शान्तिपूर्ण छलफलका लागि १२ घण्टाको यात्रा गरि न्यूयोर्कसम्म आउने निर्णय गरे ।’
त्यसैले अब्बासले वास्तवमा समस्याको समाधान गर्नुको साट्टो समस्या अझ बढाइरहेको राजदूत डेननले आरोप लगाएका हुन् । उता अमेरिकी राजदूत निक्की हेलेले पनि राष्ट्रपति अब्बासलाई समझदारीपूर्वक निर्णय लिएर प्यालेस्टाइन वासीहरुको जीवन सुधार्न आग्रह गरेकी छन् ।
