काठमाडौँ — अमेरिकी व्यवसायी इलन मस्कको कम्पनी स्पेसएक्सले अहिलेसम्मकै शक्तिशाली रकेट मंगलग्रहमा पठाएको छ ।
अमेरिकाको केनेडी स्पेस सेन्टरबाट रकेट मंगल ग्रहको लागि आज बिहान उठेको हो ।

यो सटल सिस्टम नामक रकेटपछिको सबैभन्दा शक्तिशाली मानिएको छ । सटल सिस्टम अहिले सञ्चालनमा छैन् । लञ्च गर्ने समय बिनाकुनै समस्या रकेट अट्लान्टिक महासागर हुँदै उडेको थियो ।

स्पेसएक्सका प्रमुख कार्यकारी अधिकृत एलन मस्कले यो रोबोट बनाउँदा भोग्नुपरेको अप्ठ्याराका कारणले यसले सफलता पाउने कुरामा आफू आधा मात्रै विश्वस्त रहेको अनुभव सुनाए ।

‘रकेट उड्ने बेलामा पड्किने कल्पना गरेको थिएँ तर भाग्यवत यस्तो भएन’, सफलतापूर्वक रकेट लञ्च गरेपछि उनले भने । यसको सफलतासँगै फाल्कन हेभी रकेट अहिले सञ्चालनमा रहेकामध्ये सबैभन्दा शक्तिशाली बनेको छ ।

यसको कार्यक्षमता सञ्चालनमा रहेको दोस्रो शक्तिशाली रकेट डेल्टा फोर हेभीको भन्दा दुई गुणा बढी भए पनि लागत भने एक तिहाई मात्रै रहेको मस्कले बताए । यसले पृथ्वीको तल्लो घेरा (पृथ्वी वरपर २ हजार किलोमिटरसम्मको स्थान) मा ६४ टनसम्मको भारी बोकेर लैजान सक्छ ।

परीक्षणको रुपमा गरिएको यो रकेट मिसनमा यात्रुको सट्टा टेस्ला स्पोर्ट्सकार राखिएको छ भने कारमा मानिसजस्तै डमी राखिएको छ ।

रकेटले कारलाई क्षुद्रग्रह घेरा नजिकै छाडेको र यो मंगलग्रह तर्फ जाने बताइएको छ । यो रकेटसहितको कारलाई मंगलग्रहसम्मको दुरी करिब २० करोड माइल पूरा गर्न कम्तिमा ६ महिना लाग्नेछ ।
फाल्कोन हेभीमा स्पेसएक्सको तीनवडा फाल्कोन नाइन जोडिएको छ र स्पेसएक्सले यसअघि अभ्यास गरेजस्तै रकेटका तलका भागहरु पुन: पृथ्वीमा आएर बसेका छन् । यीमध्ये दुईमात्रै सफलतापूर्वक पृथ्वीमा झरेका थिए । समुद्रमा अवतरण गराउन खोजिएको रकेटको अर्को एक भाग भने पानीमा खसेको छ ।

अहिलेसम्मकै शक्तिशाली रकेटको सफलतापूर्वक प्रक्षेपण हुनुले भविष्यमा ठूला आकारका स्याटेलाइट अन्तरिक्षमा पठाउन सम्भव हुने विज्ञहरुले बताएका छन् ।

-बीबीसी