लिस्बोन – तामाङ समाज पोर्चुगलले सोनाम ल्होछार २८५४ को अवसरमा सोनाम ल्होछार सांस्कृतिक  साँझ कार्यक्रम २८ जनवरी २०१८ (आइतबार) लिस्बोनको काइस दु सोद्रेमा रहेको Time Out Studio, Mercado Do Rebeira मा भव्यताको साथ सम्पन्न गरेको छ |

तामाङ समाज पोर्चुगल अध्यक्ष सोनाम लामा तामाङको अध्यक्षमा  भएको कार्यक्रमको उद्घाटन  पोर्तुगलका लागि अबैतनिक नेपाली बाणिज्यदुत मकर हमालले गरेका थिए भने  समाजका सदस्य मिना स्याङतानले  स्वागत मन्तव्य राखेकी थिइन् |

कार्यक्रममा पोर्तुगलमा जनवरी २५ मा सवारी दुर्घटनामा नेपाली चेली चेतमाया खुलालको असमायिक निधनप्रति गहिरो शोक व्यक्त गर्दै एक मिनेट मौनधारण गरिएको थियो भने घाइते सिघ्र स्वास्थ्यलाभको कामना गरिएको थियो ।

कार्यक्रममा अबैतनिक नेपाली बाणिज्यदुत मकर हमालले बहुजातिहरुको साझा फुलबारी भएको भन्दै तामाङ समाजले आफ्नो संस्कृतिलाई जगेर्ना गर्न तामाङ समाजले गरेका हरेक गतिविधिलाई कन्सुलर कार्यालयको तर्फबाट पुर्ण सहयोग रहने बताएका थिए ।

कार्यक्रममा नेपाली पर्यटन दुत रमेशकुमार गुरुङ, एनआरएनए आईसिसी सदस्य पेम्बा शेर्पा, नरेन्द्र हमाल, एनआरएनए पोर्तुगलका अध्यक्ष कुबेर कार्की , नारी समाज पोर्तुगलकी कार्यबाहक अध्यक्ष निर्मला खराल (ढकाल), जनजाति महासंघ पोर्तुगलका अध्यक्ष नरभुपाल राईले सोनाम ल्होसारको शुभकामना व्यक्त गरेका थिए ।

कार्यक्रममा अतिथी कलाकारहरु ईन्दिरा गोले र कृष्ण वाईबाका साथमा पोर्चुगलमा रहेका स्थानीय नेपाली कलाकारहरुले  नाचगान गरी मनोरंजन गरेका थिए |

समाजका सचिब बिन्दुमाया लामा तामाङ र बिनोद लामा तामाङले कुशलतापूर्वक संचालन गरेका थिए ।