काठमाडौं, १९ पुस — चीनको नयाँ हाइपरसोनिक ब्यालिस्टिक क्षेप्यास्त्र डीएफ–१७ भारत, जापान र अमेरिकाका लागि पनि खतराका रूपमा रहेको बताइएको छ ।

जापानले अघिल्लो महिना अमेरिकी जासूसी सूत्रहरूलाई उद्धृत गर्दै चीनको जनमुक्ति सेनाको रकेट फोर्सले नयाँ क्षेप्यास्त्र हाइपरसोनिक ग्लाइड भेहिकल (एचजीभी) को परीक्षण गरेको छ जसलाई डीएफ–१७ नाम दिइएको छ ।

यसको पहिलो परीक्षण नोभेम्बर महिनाको शुरुवातमा गरिएको थियो । परीक्षणका बेलामा यो क्षेप्यास्त्र १४ सय किलोमिटर पर पुगेको थियो ।

साउथ चाइना मर्निङ पोस्टमा बेइजिङका सैन्य विश्लेषक झोउ चेनमिङले भने, ‘पारम्परिक ब्यालिस्टिक क्षेप्यास्त्रको तुलनामा एचजीभी एकदमै जटिल छ र यसलाई खसाल्न गाह्रो छ । अमेरिका, जापान र भारतले चीनको एचजीभी प्रविधि विकासबाट चिन्तित हुनुपर्ने आवश्यकता छ । यो जापानका सैनिक अड्डा र भारतमा परमाणु रिएक्टरहरूसम्म शीघ्रता र सटीकताका साथ पुग्न सक्छ ।’ यो विश्लेषणले भारतीय सुरक्षा संस्थाहरूको निद्रा गायब गराइदिएको छ ।

जनमुक्ति सेनाका पूर्वसदस्य साङ झोङपिङले एचजीभी हतियारलाई ब्यालिस्टिक क्षेप्यास्त्र डीएफ–४१ का साथ प्रयोग गर्न मिल्ने बताएका छन् । यस क्षेप्यास्त्रको मारक क्षमता १२ हजार किलोमिटर टाढासम्म छ ।

यो जम्मा एक घन्टाभित्र अमेरिकाको कुनै पनि ठाउँमा पुग्न सक्छ । एचजीभीले अमेरिकी क्षेप्यास्त्र प्रतिरक्षा प्रणाली थाडलाई पनि ध्वस्त पार्न सक्छ । उत्तर कोरियाको आक्रमणबाट बच्नका लागि थाडलाई दक्षिण कोरियामा तैनाथ गरिएको छ ।

एजेन्सी