-सनिल घिसिङ तामाङ

याम्बु – तामाङ समाज यूएईले शैक्षिक सहयोग हस्तान्तरण कार्यक्रम अन्तर्गत कन्यादेबी निम्न मा.बि. नेत्रवती गाँउपालिका – ४ धादिङलाई नगद एक लाख एघार हजार एक सय एघार रूपैया (रू. १११,१११/-) हस्तान्तरण गरेको छ ।

नेपाल तामाङ घेदुङको केन्द्रिय कार्यलयमा आयोजित कार्यक्रममा प्रमुख अतिथि, तामाङ समाज यूएईका संस्थापक अध्यक्ष तथा किस्पाङ गाँउपालिका – नुवाकोटका प्रमुख छत्र बहादुर लामा, बिशेष अतिथि, नेपाल तामाङ घेदुङका महासचिब बाबु घिसिङ, अतिथिद्वय नेपाल तामाङ घेदुङका संगठन बिभाग प्रमुख कुलन घिसिङ र नेपाल तामाङ कलाकार संघका अध्यक्ष सन्जीब वाईबा तथा कार्यक्रमका सभापति एंव तामाङ समाज यूएईका अध्यक्ष महेश मोक्तानले सहयोग रकम लाई कन्यादेबी निम्न मा.बि. का प्र.अ. कमल बहादुर लामालाई संयुक्त रूपमा हस्तान्तरण गर्नु भएको थियो ।

यसै कार्यक्रममा समाजले समाजका संस्थापक अध्यक्ष तथा किस्पाङ गाँउपालिका – नुवाकोटका प्रमुख छत्र बहादुर लामालाई समाजको जिम्मेवारी सफलतापुर्वक समहाली प्रवासमा तामाङ जातिको मौलिक जातिय पहिचान, धर्म, संस्कृति, भाषा र कलाको संरक्षण, संवर्दन र प्रबर्द्धन गर्दै प्रवास तथा स्वदेशमा आईपरेका मानबीय एंव सामाजिक संकटको घडीमा पुर्याउनु भएको अतुलनीय योगदान तथा स्थानीय निर्बाचन २०७४ मा नुवाकोट जिल्लाको किस्पाङ गाउँपालिकाको प्रमुखमा निर्बाचित हुनुभएकोमा सम्मान गरेको थियो ।

समाजका महासचिब सनिल घिसिङले संचालन गरेको औपचारिक कार्यक्रमा आमन्त्रित पाहुनाहरूले मन्तब्यका क्रममा तामाङ समाज यूएईको सपोर्ट माई स्कूल कार्यक्रम अन्तर्गत शैक्षिक क्षेत्रको बिकासको लागि समाजले खेलेको भूमिका तथा सहयोग कार्यहरूको प्रशंसा गर्दै धन्यबाद ब्यक्त गरेका थिए । कार्यक्रममा नेपाल तामाङ घेदुङका पदाधिकारीहरू, नेपाल तामाङ कलाकार संघका पदाधिकारीहरू, कन्यादेबी निम्न मा.बि. का प्रतिनिधिहरू लगायत समाजका भूतपूर्व पदाधिकारीहरू तथा शुभेच्छुकहरूको उपस्थिति रहेको थियो ।