एमालेले फोरमसँग मिलेर सरकार बनाउन खोज्दैछ-प्रचण्ड,अब के होला ?
कावासोती, ८ पुस– नेकपा माओवादी केन्द्रका अध्यक्ष पुष्पकमल दाहाल प्रचण्डले चुनावी परिणाम सार्वजनिक भएपछि नेकपा एमालेले माओवादी बाहेकको सरकार बनाउने प्रयास गरेको खुलासा गरेका छन् ।
एमाले नेताले उपेन्द्र यादव नेतृत्वको संघीय समाजवादी फोरमसँग मिलेर सरकार बनाउने कसरत गरे पनि त्यो सफल नभएको खुलासा गरेका हुन् । नवलपुरको कावासोतीमा शनिवार आयोजित कार्यकर्ता प्रशिक्षणमा बोल्दै प्रचण्डले यस्तो खुलासा गरेका हुन् ।
प्रत्यक्षतर्फको अन्तिम मतपरिणाम आउँदा एमालेका केही नेताले माओवादीलाई एक्ल्याएर सरकार बनाउने कोशिष गरेको प्रचण्डको भनाइ थियो । तर समानुपातिकतर्फ नेपाली कांग्रेसले पनि एमालेकै हाराहारी मत ल्याएको र एमाले एक्लैको बहुमत पुग्ने स्थिति नबनेपछि एमालेका नेताहरु पार्टी एकताप्रति सकरात्मक भएको उनले बताए ।
‘नेकपा एमालेका केही नेता साथीहरुले चुनावी परिणाम पछि माओवादीले पेलेर जाने, सरकारमा सहभागी नै नगराउने रणनीति अख्तियार गर्न खोज्नुभएको थियो,’ पार्टी प्रशिक्षणमा प्रचण्डले भने, ‘तर संघीय फोरमले एमालेसँग आउन नसकिने बताएपछि त्या प्रयास सफल हुन सकेन ।’
अध्यक्ष प्रचण्डले आफूहरु तेस्रो पार्टी भए पनि जनताले सत्ताको चाबी माओवादीलाई दिएको पनि दावी गरे । एमाले नेताले माओवादीलाई अलग राखेर स्थायी सरकार नबन्ने कुरा बुझेपनि अहिले आएर पार्टी एकताप्रति सकरात्मक भएको उनको भनाइ थियो ।
प्रचण्डले आफू भने वाम गठवन्धन र पार्टी एकताप्रति पूर्ण प्रतिबद्ध रहेको पनि बताए । प्रशिक्षणमा उनले देशलाई राजनीतिक स्थिरता र आर्थिक समृद्धितर्फ डोर्याउन वामपन्थीहरुबीच एकताको विकल्प नभएकोमा पनि जोड दिए ।
आफ्नो अहिलेको प्रयास स्थायी सरकार निर्माण र पार्टी एकतालाई निष्कर्शमा पुर्याउनमा केन्द्रित हुने पनि प्रचण्डले बताए ।