राष्ट्रपति भण्डारीले ओली र प्रचण्डलाई अध्यादेशको विवादमा दलहरु मिल्न सुझाब
काठमाडौं । नेकपा एमालेका अध्यक्ष केपी शर्मा ओली, माओवादी केन्द्रका अध्यक्ष पुष्पकमल दाहाल र राष्ट्रपति विद्यादेवी भण्डारीबीच भेटवार्ता भएको छ । बुधबार राष्ट्रपति भवन शीतल निवासमा भएको द्विपक्षीय भेटवार्तामा राष्ट्रिय सभाको अध्यादेशका विषयमा छलफल केन्द्रित भएको राष्ट्रपतिका प्रेस सल्लाहकार माधव शर्माले जानकारी दिए ।
शर्माकाअनुसार भेटमा राष्ट्रपति भण्डारीले दलहरूलाई मिलेर सहमति कायम गर्न सुझाव दिएकी छन् ।
“राष्ट्रपतिले दलहरूलाई मिलेर सहमतिमा पुग्न सुझाव दिनुभएको छ,” राष्ट्रपति भण्डारीको भनाइ उद्धृत गर्दै, शर्माले भने, “दलहरूबीच संवाद भएर छिट्टै निष्कर्षमा पुग्ने राष्ट्रपतिको विश्वास छ ।”
राष्ट्रपतिसँगको भेटवार्ताका लागि अध्यक्षद्वय प्रचण्ड र ओलीका अतिरिक्त माओवादी केन्द्रका नेता नारायणकाजी श्रेष्ठ र एमाले नेता एवम् पूर्वसभामुख सुवासचन्द्र नेम्वाङ सहभागी थिए ।
