इजरायल– प्यालेस्टाइन शान्ति प्रक्रिया टर्यो
राष्ट्रसंघका लागि अमेरिकी राजदूत निक्की हलीले राष्ट्रसंघका कारण इजरायल– प्यालेस्टाइन शान्ति सम्भावना टरेको आरोप लगाएकी छन् । राष्ट्रपति डोनाल्ड ट्रम्पले अमेरिकी दूतावास जेरुसेलममा सार्ने निर्णयपछि बसेको राष्ट्रसंघको आपत्कालीन बैठकमा हलीले अमेरिका मध्यपूर्वको शान्तिप्रक्रियाका लागि इमानदार रहेको दाबी गरिन् ।
उनले राष्ट्रसंघ इजरायलप्रति शत्रुता प्रकट गर्ने संस्थामध्ये सबभन्दा अगाडि रहेको बताइन् । राष्ट्रपति डोनाल्ड ट्रम्पको अमेरिकी दूतावास तेलअभिभबाट जेरुसेलम सार्ने निर्णयको व्यापक भत्र्सना भएको छ । वेस्ट ब्यांक, गाजा स्ट्रिप र रमल्लाहमा झडप भएका छन् ।
प्यालेस्टाइनी लडाकुहरूले इजरायली क्षेत्रमा रकेट प्रहार गरेपछि इजरायलले गरेको कारबाहीमा गाजा स्ट्रिपमा कम्तीमा दुई जना प्यालेस्टाइनीको मृत्यु भएको छ । अधिकारीका अनुसार २ सय १७ जना प्यालेस्टाइनी घाइते भएका छन् । इजरायलले वेस्ट ब्यांक क्षेत्रमा थप सुरक्षाकर्मी परिचालन गरेको छ । जेरुसेलमप्रति लामो समयसम्मको अमेरिकी तटस्थताविपरीत ट्रम्पले बिहीबार जेरुसेलमलाई इजरायलको राजधानी घोषणा गरेपछि मध्यपूर्वमा तनाव चुलिएको हो ।
हमास नेता फाथी हम्मादले जेरुसेलममा दूतावास सार्ने जोसुकै ‘प्यालेस्टाइनीहरूको शत्रु भएको’ बताए । बीबीसीका अनुसार प्यालेस्टाइन समर्थित प्रदर्शनकारीले जोर्डन, इजिप्ट, इराक, टर्की, टयुनिसिया र इरानमा हजारौं मानिसले प्रदर्शन गरेका छन् । त्यसैगरी मलेसिया, बंगलादेश, पाकिस्तान, अफगानिस्तान, इन्डोनेसिया र भारत प्रशासित कश्मीरमा पनि विरोधमा र्यालीहरूको आयोजना गरिएका छन् ।
इजरायलले जेरुसेलमलाई आफ्नो राजधानी दाबी गर्दै आएको छ ।प्यालेस्टाइनीहरूले सन् १९६७ युद्धपछि इजरायलले नियन्त्रणमा लिएको पूर्वी जेरुसेलमलाई भावी राजधानी बताउने गर्छन् । प्यालेस्टाइनी प्रतिनिधि रियाद मन्सुरले ट्रम्पको कदमपछि अमेरिकालाई शान्ति मध्यस्थकर्ताका रूपमा हेर्न नसकिने बताए ।
इजरायली प्रतिनिधि डयानी डयाननले अमेरिकालाई धन्यवाद दिँदै ट्रम्पको कदम ‘इजरायलका लागि, शान्तिका लागि र विश्वका लागि कोसेढुंगा’ भएको बताए ।
