काभ्रे– बिहीबार हुने निर्वाचनमा काभ्रेमा बुथ कब्जा हुन सक्ने आकलन गरी प्रहरीले सम्भावित क्षेत्रहरुमा उच्च सतर्कता अपनाएको छ। जिल्लाका १८ वटा मतदान स्थललाई प्रहरीले उच्च संवेदनशीलमा राखेको छ।

विगतमा गुन्डागर्दीमा संलग्न कतिपय व्यक्तिहरु समेत चुनावी मैदानमा रहेको र उनीहरुले धाँधली गर्न सक्ने भएकाले उनीहरुको प्रभाव रहेको मतदान स्थललाई अति संवेदनशील सूचीमा राखिएको हो। क्षेत्र नम्बर १ को ख मा नेपाली कांग्रेसबाट प्रदेशसभा उम्मेदवार बनेका गणेश लामाको खहरेपाँगु मतदान स्थललाई अति संवेदनशील सूचीमा राखिएको छ।

त्यस्तै, कांग्रेसबाट क्षेत्र नम्बर १ का उम्मेदवार तीर्थ लामाले मतदान गर्ने सिपाली मतदान केन्द्रलाई पनि अति संवेदनशील सूचीमा राखिएको छ। जिल्लाको डाडाँपारि र कोशीपारि क्षेत्रका मतदान स्थललाई अति संवेदनशील सूचीमा राखिएको जिल्ला प्रहरी कार्यालय काभ्रेले जनाएको छ।

‘गुन्डागर्दीमा संलग्नहरु निगरानीमा छन्’, काभ्रेका प्रहरी प्रमुख एसपी सहकुल थापा भन्छन्, ‘केहीलाई पक्राउ पनि गरेका छौं, निष्पक्ष तरिकाले निर्वाचन गराउन हामी सक्रिय छौं।’

काभ्रेमा निर्वाचन विरोधी गतिविधिमा संलग्न १३ जना थुनामा छन्। कसैले बुथ कब्जाको प्रयास गरे गोली हान्न प्रहरी नेतृत्वले निर्देशन दिएको छ।