काभ्रेको चौरीदेउराली गाउँपालिका ९ गोठपानीमा चार मोटरसाइकलमा आगजनी
बनेपा : काभ्रेको चौरीदेउराली गाउँपालिका ९ गोठपानीमा आइतबार राति अज्ञात समूहले चार वटा मोटरसाइकल आगजनी गरेको छ। जिल्ला प्रहरी कार्यालय काभ्रेका अनुसार स्थानीय यज्ञप्रसाद चौलागाईको घर अगाडि पार्किङ्गमा राखेका चार मोटरसाइकलमा आगजनी भएको हो।
आगलागीबाट मोटरसाइकलमा पूर्णरुपमा क्षति पुगेको छ । मोटरसाइकलमा कसले आगजनी गरेको हो भन्ने कुरा अझै पत्ता लाग्न सकेको छैन ।
आगलागीले चौरीदेउराली ९ बस्ने युवराज चौलागाईको बा ८३ प २९१४ नम्बरको मोटरसाइकल, मोहनप्रसाद चौलागाईको बा ७३ प २२२३ नम्बरको, कमलप्रसाद चौलागाईको बा ५३ प ७०९४ नम्बरको मोटरसाइकल र सोही वडाका निर्मला चौलागाईको बा ८३ प४४५५ नम्बरको मोटरसाइकल पूर्ण रुपमा जलेका छन् ।
जिल्ला प्रहरी कार्यालयका डीएसपी महेन्द्र मरासिनीका अनुसार आगजनीमा संलग्नको खोजी जारी छ। उनका अनुसार घटना घटे लगतै इलाका प्रहरी कार्यालय कात्तिके देउराली प्रहरीको टोलीले खोजी कार्य गरिरहेको छ।