गुल्मीका एक युवाले जापान छोडेर आफ्नै गाउँमै व्यावसायिक केराखेती गरेर राम्रो आम्दानी गर्दै आएका छन् । मुसिकोट नगरपालिका–१ भर्माचौर निवासी ४४ वर्षीय युवा चन्द्रमणि घिमिरेले व्यावसायिक केराखेतीसँगै मेवा, खुर्सानी र कुखुरापालन व्यवसायबाट झन्डै डेढ वर्षमा रु १० लाख आम्दानी गर्न सफल भएका छन् ।

* घिमिरेले झन्डै चार रोपनी जग्गामा एक वर्षयता आफ्नै खेतमा रु ४० हजारको लगानीबाट २८० केराको बोट लगाएर सुरु गरेको केराखेती वृद्धि हुँदै झन्डै ८०० केराका घरी उत्पादन भइरहेको छ|

* रोजगारीको सिलसिलामा विदेशका विभिन्न देशमा नौ वर्ष दुःख पीडा भोग्दै पछिल्लो समयमा जापानमा तीनवर्ष बिताएर स्वदेश फर्केर अब आफ्नै गाउँघरमा सानोतिनो व्यवसायको सुरुवातको थालनी गरेको घिमिरे बताउँछन् |

* घिमिरे भन्छन्, ‘युवा विदेश जाने सपना त्यागेर आफ्नै गाउँघरमा सानोतिनो पेसा व्यवसाय गरी आधुनिक कृषि गरेर पनि मनग्य आम्दानी गर्न सकिने हुँदा आफूलेजस्तै अन्य युवालाई आफ्नो सिको गरेर विदेश जानुभन्दा आफ्नै जन्मभूमिमा केही गरेर आत्मनिर्भर भएर बाँच्न सकिन्छ ।’

* उनी आफ्नो केरा व्यवसायलाई अझ वृद्धि गर्दै लैजाने र गाउँलाई नै केरामय बनाउने सोचमा छन् ।
* हाल तीन स्थानीय जात अन्तर्गत फुसे्र, झोप्रे, मुहुरे र तीन उन्नत जातअन्तर्गत चिनी केरा, झापाली माल्भोग र मनिपुरे माल्भोग जात गरी छ जातका व्यावसायिक केराखेती गरिरहेका छन् ।
* आफूले उत्पादन गरेका केरा, खुर्सानी, मेवा र कुखुरा आदिको राम्रो व्यापारले गर्दा बजारमा मागअनुसार उत्पादित वस्तु आफूले बजारमा पुर्‍याउन नसकेको घिमिरे बताउँछन् ।

स्रोत: रासस