काठमाण्डौ । पुत्रको शव देख्दा कुन पिताको गह नभरिएला र ? यस्तै भयो पुष्पकमल दाहालको हकमा पनि । नर्भिक अस्पतालमा आफ्नो पुत्र प्रकाशको शव देखेपछि भक्कानिएका दाहालले आँशु थाम्न सकेनन् र मर्माहत बनेर निकै बेर रोइरहे ।

आफ्नो पत्नि सीता र परिवारका अन्य सदस्यहरु सहित नर्भिक अस्पताल पुग्नु भएका अध्यक्ष दाहालले छोरा प्रकाशको शव हेरेपछि भक्कानिदै नर्भिकका प्रमुख कार्यकारी अधिकृत राजेन्द्रबहादुर सिंहको कार्यकक्षमा पुगेर निकै समय भावविव्हल बन्नु भएको थियो । चार बर्ष अघि छोरी गंगालाई गुमाउनु भएका दाहालले छोरा प्रकाशलाई निर्वाचनको दौडादौडको विचमा सदाको लागि गुमाउनु परेको छ । आफ्नो राजनीतिक सहयोगी पनि रहेका छोरा प्रकाशले लामो समयदेखि पिताको राजनीति र बिभिन्न गतिविधिमा साथ दिदै आउनु भएको थियो ।

यसैबीच प्रकाशको निधनको खबर फैलिए लगत्तै नर्भिक अस्पतालमा आफन्त , शुभचिन्तक र बिभिन्न दलका नेताहरु एवं समाजका बिभिन्न क्षेत्रका व्यक्तिहरुको ठूलो घुँइचो लागेको छ । आफन्तहरु निकै भावविव्ह्ल बनेका थिए भने सबैको अनुहार मलिन देखिएको थियो । पत्नी विना मगर पति प्रकाशको निधनको खबर सुनेर अस्पताल पुग्दा निकै मर्माहत बनेकी थिइन् ।

अस्पताल परिसरमा विहानैदेखि सुरक्षाको व्यवस्था कडा पारिएको थियो भने भीड बढ्दै जाँदा प्रहरीले भीड नियन्त्रण गर्न हम्मे हम्मे परेको थियो ।