भक्तपुर  । तामाङ भाषाको चलचित्र ‘म्लाङ प्वाँहार’ (कालो अरिङ्गाल)को डिभिडी आज सार्वजनिक गरिएको छ । रु २५ लाखको लागतमा बनेको उक्त चलचित्रमा समाजका गरिब, निमुखा, विपन्न र उत्पीडनमा परेका वर्गमाथि पूँजीपति वर्गले गरेको अन्याय, अत्याचार, शोषण र राजनीतिक विकृतिविरुद्ध व्यङ्ग्य गरिएको चलचित्रका निर्माता बिकु थोकर तामाङ्ले जानकारी दिनुभयो ।

कार्यक्रममा लामा गुरु लाक्पा दोर्जे तामाङले डिभिडी सार्वजनिक गर्दै अर्थ अभावका कारण तामाङ चलचित्र निर्माण हुन नसकेको अवस्थामा यो चलचित्रले आर्थिक लाभ पनि गर्न सफल भएको बताउनुभयो ।

चलचित्रका नायकमा जगे लोप्चन तामाङ , नायिकामा सुनिता लुङ्बा तामाङ , खलनायकमा बिकु थोकर तामाङ , नृत्यमा सिर्जना तामाङ, सुष्मा मोक्तान तामाङ , सफल दोङ तामाङ लगायत कलाकारको भूमिका छ । चलचित्रको निर्माण थोकर फिल्म्स प्रालि र निर्देशन शंकर महर्जनले गरेका छन् |

चलचित्रमा संगीत विशाल कल्ताङ  तामाङ  र विशाल थिङ तामाङ  तथा  रचना कुमार स्याङतान तामाङको रहेको छ । चलचित्रको कथा ऋतुराज पाख्रिन  तामाङले लेख्नुभएको छ । चलचित्रको नृत्य निर्देशन अजय स्याङतान तामाङले गर्नुभएको छ ।

देशका १४ जिल्लाका ३५ ठाउँमा प्रदर्शन गरिएको उक्त चलचित्रबाट आम्दानी भएको रु ३५ लाखमध्ये रु १५ लाख गुम्बा र मन्दिर निर्माणमा सहयोग पु¥याउनाका साथै मिर्गौला तथा अर्बुद रोगीका उपचारमा समेत खर्च गरिएको निर्माता बिकु  थोकर तामाङले जानकारी दिनुभयो ।