सरकारले धादिङको गजुरीमा ठूलो संख्यामा हताहत हुने गरी शनिबार बिहान भएको बस दुर्घटनाको छानबिन गर्न समिति गठन गरेको छ ।

सरकारले शनिबार गृह मन्त्रालयका सहसचिव मानबहादुर विश्वकर्माको संयोजकत्वमा समिति गठन गरेको हो । समितिमा नेपाल प्रहरी, सशस्त्र प्रहरी र राष्ट्रिय अनुसन्धान विभागका वरिष्ठ उपरिक्षकलाई राखिएको छ ।

समितिलाई भविष्यमा यस्ता दुर्घटना हुन नदिन सरकारले चाल्नुपर्ने कदम तथा दुर्घटना के कारणले भएको हो भन्नेबारेमा सात दिनभित्र सुझाव दिन कार्यादेश दिइएको छ ।

गृह मन्त्रालयले सार्वजनिक यातायातलाई सुरक्षित र भरपर्दो बनाउन अपनाउनुपर्ने अनुगमन र निगरानी कार्यलाई कडाइका साथ कार्यान्वयन गर्न स्थानीय प्रशासन, ट्राफिक र जिल्ला प्रहरी कार्यालयहरूलाई निर्देशनसमेत दिएको छ ।