अोली निवासमा प्रचण्ड र देवी ज्ञवालीको भेटघाट
काठमाडौं । देवी ज्ञवालीको हसमुख स्वभाव मन नपराउने कमै होलान्। बोल्दा उनी सधै मुहार हसिलो पार्छन्। यिनै हसिला ज्ञवालीका लागि गएको स्थानीय चुनाव पीडाको भकारी बन्यो।
चुनावी परिणाम आउने क्रममा भएको झेल्ली सहन नसकेर ज्ञवाली बेलाबखत निकै आक्रोशमा हुन्थे। तर सन्तुलित शब्द चयन गर्दै मुहार उज्यालो पारेरै ज्ञवालीले मिडियामा अभिव्यक्ति दिन्थे। ज्ञवालीले आफूमा भएको सहन क्षमता उतिबेलै प्रदर्शन गरेका हुन्।
भरतपुर महानगर मेयरमा एमाले उम्मेद्वार बनेका ज्ञवाली स्थानीय तह चुनावमा सर्वाधिक चर्चामा रहे।
ज्ञवालीले स्थानीय तह निर्वाचनमा पाएको चर्चा प्रचण्डपुत्री रेणु दाहालसँगको प्रतिस्पर्धाकाकारण थियो। उनै ज्ञवालीको चर्चा फेरि सुरु भएको छ। चर्चाको तार फेरि पनि दाहालसँगै जोडिएको छ।
छोरी रेणुसँगको ज्ञवालीको तिक्ततापूर्ण संघर्ष बदलिएर बुबा प्रचण्डसँग हार्दिकतामा परिणत भएको छ। प्रतिनिधि र प्रदेश सभा चुनावसम्म आइपुग्दा स्थानीय चुनावको आपसी घर्षण सहकार्यमा रुपान्तरित भएको छ।
वाम एकताले एमाले र माओवादी पार्टी परिवारलाई मात्रै मिलाएको छैन। दुई पार्टीबीचको तिक्तता बिर्सेर भएको मिलनमा थुप्रै व्यक्ति र परिवारका खस्रा सम्बन्ध पिसिएर मसिना भएका छन्। त्यसको सबैभन्दा गाढा प्रमाण हो ज्ञवाली र दहाल परिवार।
वाम एकता पछि पार्टीका दुई अध्यक्ष ओली र दाहालबीचको पानी बाराबारको स्थिति तोडिएर अचेल आपसका घरमा पाहुना हुने, भेट्ने र सँगै चुनावी रणनीति तय गर्ने तहमा विकसित भएको छ।
बिहीबार माओवादी पार्टी अध्यक्ष दाहाल एमाले पार्टी अध्यक्ष केपी ओली निवास बालकोट पुगे। ओली निवासमा दाहालको भ्रमण अचेल सामान्य बनेको छ। तर बुधबारको यो ओली निवास भ्रमणका क्रममा देवी ज्ञवालीसँग ओलीसहित प्रचण्ड र उनका पुत्र प्रकाशको तस्बिर सार्वजनिक भएपछि धेरैका आँखा तिल्मिलाए। फेरिएको राजनीतिले खिचेको यो तस्बिरले धेरै कुरा एकै पटकमा बोलेको छ। तस्बिर हेर्नेलाई तस्बिरका सबै भाव र भाका बुझ्न हम्मेहम्मे पर्छ।
गमक्क परेर बाक्ला गाला फैलाएका प्रशन्न मुद्राका प्रचण्ड र सदावहार हसमुख ज्ञवालीको तस्बिर मिडिया र समाजिक सञ्जालका लागि बुधबारे मुख्य खुराक बनेको छ।
