मलेसियाको पेनाङ बस दुर्घटनामा नेपालीको ज्यान गएको छैनः दूतावास
मलेसिया । ८ जनाको ज्यान जानेगरी आज बिहान मलेसियाको पेनाङ शहरमा भएको दुर्घटनामा नेपालीको मृत्यु नभएको क्वालालम्पुरस्थित नेपाली राजदूतावासले पुष्टि गरेको छ ।
दूतावासले विज्ञप्ति निकाली नेपाली कामदारको मृत्यु नभएको पुष्टि गरेको हो । दुर्घटनामा केही नेपाली कामदारहरू घाइते भएको र उनीहरूको नाम ठेगाना पत्ता लगाउन प्रयास गरिएको दूतावासले जनाएको छ ।
उत्क दुर्घटनामा मृत्यु हुने नेपाली नभर्इ ७ जना इण्डोनेेसियन र एक जना मलेसियन नागरिक भएको दूतावासले बताएको छ ।
दूतावासका द्धितीय सचिव प्रेमराज गौतमले घटनाबारे बुझ्न पेनाङस्थित कन्सुलेट जनरललाई घटनास्थलमा पठाएको र स्थानीय प्रहरी अधिकारीहरुसँग समन्वय भइरहेको उनले जनाकारी दिए ।
स्थानीय सञ्चारमाध्यमहरुका अनुसार बिदेशी कामदार बोकेका दुईवटा बस आपसमा जुध्दा आठ जनाको मृत्यु भएको छ ।
सोनी कम्पनीको कारखानामा कार्यरत नेपाली र इण्डोनेेसियन कामदार बोकेका बस जुधेको स्थानीय सञ्चारमाध्यमहरुले जनाएका छन् ।
बिहान साढे ५ बजेतिर भएको दुर्घटनामा परेर अन्य ३३ जना कामदार गम्भीर घाइते भएको न्यू स्ट्रेट टाइम्सले जनाएको छ ।