संघीय समाजवादीका जनजाति नेता प्रत्यक्ष चुनाव लड्न हच्किए,समानुपातिक तर्फ जोड
२९ असोज, काठमाडौं । स्थानीय तह चुनावबाट मुलुकको चौथो शक्ति बनेको संघीय समाजवादी फोरमका अधिकांश जनजाति नेताहरु प्रत्यक्ष चुनाव लड्न नमानेपछि समानुपातिक सूची बनाउन सकस परेको छ ।
पार्टीको शीर्ष नेतृत्वमा रहेका आदिवासी जनजाति नेताहरु समानुपातिकमा बस्न खोजेका कारण मधेशी नेताहरु आक्रोशित बनेका छन् । बरिष्ठ नेता अशोक राई, सहअध्यक्ष राजेन्द्र श्रेष्ठ, रकम चेम्जोङ, रणध्वज कन्दङ्वा, हेमराज राई लगायतका नेताहरु प्रत्यक्ष चुनाव लड्न डराएका छन् ।
मधेसमा फोरमले स्थानीय चुनावमा राम्रो नतिजा ल्याए पनि पहाडमा कमजोर उपस्थिति देखिएकाले नेताहरु चुनाव लड्न हच्किएका हुन् ।
स्रोतका अनुसार पार्टी बैठकमा सहअध्यक्ष राजेन्द्र श्रेष्ठलाई काठमाडौंबाट चुनाव लड्न नेताहरुले आग्रह गरेका थिए । नेवार समुदायको बाहुल्य रहेको काठमाडौंमा पहिचानको नारा लिएर चुनाव लड्न श्रेष्ठलाई दबाब भए पनि उनले समानुपातिक ताकेका छन् ।
स्थानीय चुनावमा संघीय समाजवादी फोरम र नयाँ शक्ति मिलेर चुनाव लड्दा पनि ६ हजार मत कटाउन नसकिएकाले काठमाडौंमा श्रेष्ठले चुनाव लड्ने आँट नगरेका हुन् । श्रेष्ठ एमालेमा हुँदा २ पटक सांसद जितेका थिए ।
त्यस्तै बरिष्ठ नेता अशोक राईको नाम सुनसरी १ बाट सिफारिस भएर आए पनि उनी प्रत्यक्ष लड्न इच्छुक छैनन् । एमालेमा हुँदा राई दुई पटक खोटाङबाट निर्वाचित भएका थिए ।
सुनसरी १ मा धरान उपमहानगरपालिका सहित अन्य स्थानीय तहमा एमालेले जितेको कारण राई त्यहाँ जान हच्किएका हुन् ।
अर्का नेता रकम चेम्जोङलाई धनकुटाबाट चुनाव लड्न आग्रह गरिए पनि उनी समानुपातिकमा बस्न रुचाएका छन् । भोजपुर घर भएका पूर्वमन्त्री हेमराज राई र युवा नेता अजम्बर राई काङमाङ पनि प्रत्यक्ष चुनाव नलड्ने पक्षमा छन् । अजम्बर संघीय समाजवादीबाट २०७० को चुनावमा प्रत्यक्ष उम्मेदवार बनेर एमालेसँग पराजित भएका थिए ।
अर्का नेता आङकाजी शेर्पा पनि समानुपातिकमा बस्न रुचाएका छन् । उनी २०७० को संविधानसभा चुनावमा काठमाडौं ३ बाट उम्मेदवार बनेका थिए तर, जमानत जफत भयो । उनको गृहजिल्ला सोलुखुम्बुमा पनि संघीय समाजवादीको जमानत जफत भएको थियो ।
फोरमले राष्ट्रिय पार्टी बन्न जनजाति पार्टीसँग एकीकरण गरेपनि केही उपलव्धी नभएको एक मधेसी नेताले बताए । स्थानीय चुनावमा पहाडका ५५ जिल्लामा एउटा पनि स्थानीय तह जिताउन नसक्ने नेताहरु अहिले पनि प्रत्यक्ष चुनाव लड्न डराएर समानुपातिकमा जोड गरिरहेको आरोप लगाए ।
तत्कालिन उपाध्यक्ष अशोक राईको नेतृत्वमा एमालेबाट २०६९ सालमा विद्रोह गरेर आदिवासी जनजाति नेताहरुले गठन भएको संघीय समाजवादी फोरमले दोस्रो संविधानसभा निर्वाचनमा एक सिट पनि जित्न सकेन । समानुपातिकबाट ५ सिट पाएको संघीय समाजवादीले मधेसी जनअधिकार फोरमसँग एकीकरण गरेपछि संंघीय समाजवादी फोरम बनेको हो ।
फोरमले ३४ स्थानीय तह जितेर चौथो शक्ति बन्दा पहाडमा एउटा पनि जित्न सकेन । उपेन्द्र यादव लगायत मधेसका प्रभावशाली नेताहरु भने प्रत्यक्षमै उम्मेदवार बन्ने भएका छन् ।
