८ मन्त्रीले आज बेलुकी ७ बजे सपथ लिँदै, ६४ सदस्यीय भयो मन्त्रीपरिषद
काठमाडौं, असोज २८ – प्रधानमन्त्री शेरबहादुर देउवाले शुक्रबार नियुक्त गरेका चारजना मन्त्री र चारजना राज्यमन्त्रीको सपथ बेलुकी ७ बजे हुने भएको छ ।
निर्वाचन आयोगका पदाधिकारसँगको छलफल पछि राष्ट्रपतिले बेलुकी ७ बजे सपथको समय निर्धारण गर्नुभएको प्रधानमन्त्री प्रेस संयोजक गोविन्द परियारले जानकारी दिनुभयो । निर्वाचन आचार संहिता लागु भइसकेपछि सरकार विस्तार गर्न मिल्ने नमिल्ने भन्ने बारेमा राष्ट्रपति भण्डारीले निर्वाचन आयोगसँग छलफल गर्नुभएको थियो ।
छलफलमा आयोगका आयुक्तहरुले आचार संहिता लागु भइसकेपछि यसअघि पनि सरकार विस्तार भएकाले अब पनि सरकार विस्तार हुन सक्ने बताएका थिए । निर्वाचन आचारसंहिता जारी भइसकेपछि प्रधानमन्त्रीले मन्त्रीपरिषद विस्तार गर्ने निर्णय गरेकोमा यसअघि असन्तुष्ट रहेको आयोगले राष्ट्रपतिसँग भने मन्त्री परिषद विस्तार रोक्न नसक्ने बताएको थियो ।
प्रधानमन्त्री शेरवहादुर देउवाले शुक्रबार राप्रपाका चारजना मन्त्री र चारजना राज्यमन्त्री थप्दै मन्त्रीपरिषद विस्तार गर्ने निर्णय गर्नुभएको हो । यी मन्त्री थपिएसँगै देउवा नेतृत्वको मन्त्री परिषद ६४ सदस्यीय भएको छ ।
