तामाङ संस्कारमा बच्चाको दाँत उम्रेमा वा फुलेमा के गरिन्छ ?
तामाङ जातिमा बच्चाहरुको आठ महिनामा दाँत उम्रेमा अशुभ मानिन्छ र मामा खलकलाई पिरोल्छ भन्ने धारणा छ | यसको समाधानका लागि घरवालाले भान्जा भान्जिलाई लिएर मामा कहाँ जानुपर्दछ | यसरी मामा कहाँ जाँदा मामालाई कहिले कुन समयमा मामा सगुन कोसेली लिएर जाने हो सो सुचित गर्नुपर्छ | यसो गर्नुको मतलब आठ महिनामा दाँत आएका भान्जा भान्जिको अनुहार सगुन नगरी, उपहार नदिए सम्म हेरेमा खलकलाई पिरोल्छ भनेर हो | त्यस पछि मामाले भान्जा वा भान्जि जसको दाँत आएको हो, त्यसका लागि थाल कचौरा वा भाँडो जे सकिन्छ त्यो नयाँ उपहार किनेर दिने गर्दछन् |
भान्जाभान्जि लिएर आएकी दिदीबहिनीले घरको मुल ढोकामा सगुन राख्छन् | त्यसपछि घरको मुल ढोका भित्र मामाले उल्टो फर्केर भान्जा वा भान्जीलाई उल्टैबाट टिका लगाई ,उल्टैबाट उपहार स्वरुप ल्याएको भाँडाले मामालाई नपिरोल है भन्दै उम्रेको दाँतमा तीन चोटि छुवाइ सूल्टो फर्केर भान्जाभान्जिको मुख हेर्ने गर्दछन | अनि दिदीबहिनीले भान्जाभान्जिलाई मामासँग ढोग गराउँछन् | दिदिबहिनीले पनि दाजुलाई दोग गर्दै घर भित्र पसी सम्पूर्ण मान्यजनलाई ढोगभेट गर्दछन् र खानपिन गर्दछन् | यस् बिधिमा कसैलाई निमन्त्रण गर्ने प्रचलन छैन | त्यसैगरी दाँत जुनसुकै उमेरमा फुलेमा सुनको दाँत आँफैले हालेर लाउने प्रचलन पनि छ |
पहिलापहिला गाउँठाउँमा रहेको यस प्रकारको चलन आजकाल बिस्तारै हराउदै गएको देखिन्छ |