काठमाडौं  – स्थानीय तह चुनाव सकिन नभ्याउँदै प्रतिनिधिसभा र प्रदेशसभा चुनावको तयारी सुरु भैसकेको छ । चुनाव मंसिर १० र २१ गतेका लागि तोकिएको छ ।  एमालेबाट मुख्य मन्त्रीका लागि चर्चा भएका नामहरु यसप्रकार रहेका छन् |

प्रदेश नम्बर १ :भीम आचार्य, योगेश भट्टराई, शेरधन राई

प्रदेश १ मा एमालेबाट भीम आचार्य र योगेश भट्टराईलाई सम्भावित उम्मेदवारको रुपमा हेरिएको छ । भीम आचार्य र योगेश भट्टराईले इच्छा नदेखाएमा प्रदेश सहसंयोजक तथा पोलिटव्यूरो सदस्य शेरधन राईलाई अगाडि सार्ने तयारी छ ।

प्रदेश नम्बर २ : सत्यनारायण मण्डल, नागेन्द्र चौधरी

प्रदेश २ बाट स्थायी कमिटी सदस्य सत्यनारायण मण्डल, पोलिटब्यूरो सदस्य नागेन्द्र चौधरी र केन्द्रीय सदस्य रघुवीर महासेठ एमालेका तर्फबाट मुख्यमन्त्रीका दाबेदार हुन् ।

उनीहरुमध्ये एकलाई अघि सारेर एमाले २ नम्बर प्रदेशको चुनाव लड्न सक्ने एक नेताले बताए । प्रदेश नम्बर २ एमालेको कमजोर प्रभाव रहेको प्रदेश हो । यहाँ कसैसँग तालमेल गरेको अवस्थामा मात्रै मुख्यमन्त्रीमा एमालेको सम्भावना रहन्छ ।

प्रदेश नम्बर ३ : अष्टलक्ष्मी शाक्य, सुरेन्द्र पाण्डे, राजेन्द्र पाण्डे, शेरबहादुर तामाङ

एमालेको राम्रो प्रभाव रहेको प्रदेश नम्बर ३ बाट मुख्यमन्त्रीका लागि पार्टी पदाधिकारीबाट उपाध्यक्ष अष्टलक्ष्मी शाक्य एकमात्र दाबेदार देखिनुभएको छ । पार्टी महासचिव ईश्वर पोखरेल मुख्यमन्त्रीको दाबेदार बन्ने सम्भावना छैन ।स्थायी कमिटी सदस्य सुरेन्द्र पाण्डे, पोलिटब्यूरो सदस्य राजेन्द्र पाण्डे र शेरबहादुर तामाङ पनि मुख्यमन्त्रीको उम्मेदवार बन्ने चर्चा छ ।

प्रदेश नम्बर ४ : रविन्द्र अधिकारी, पृथ्वीसुब्बा गुरुङ, किरण गुरुङ, खगराज अधिकारी

एमालेले प्रदेश ४ बाट पार्टी सचिव तथा संगठन बिभाग प्रमुख पृथ्वीसुब्बा गुरुङ र प्रदेश संयोजक तथा स्थायी कमिटी सदस्य किरण गुरुङमध्ये एकलाई मुख्यमन्त्रीका रुपमा अघि सार्ने चर्चा छ । चर्चित युवा नेता तथा संसदको विकास समितिका सभापति रविन्द्र अधिकारी र अर्का नेता खगराज अधिकारीलाई पनि मुख्यमन्त्रीका सम्भावित उम्मेदवारको रुपमा हेरिएको छ ।

प्रदेश नम्बर ५ :

स्थायी कमिटीमा सबैभन्दा धेरै सदस्य रहेको प्रदेश ५ बाट एमालेका मुख्यमन्त्रीका उम्मेदवार को बन्ने भन्ने अन्योल छ ।उपाध्यक्ष बामदेव गौतम, युवराज ज्ञवाली, उपमहासचिव बिष्णु पौडेल, घनश्याम भुसाल, सचिव प्रदीप ज्ञवाली, गोकर्ण विष्ट र स्थायी कमिटी सदस्य शंकर पोखरेल तथा छविलाल विश्वकर्मा यही प्रदेशका हुन् । राष्ट्रिय राजनीतिमा आफ्नो पहिचान बनाइसकेका यी कुनै पनि नेताले प्रदेशमा जाने इच्छा देखाएका छैनन् । यो प्रदेशबाट एमाले नेतामा को मुख्यमन्त्रीको उम्मेदवार बन्ने भन्नेमा ठूलै बहस हुने देखिन्छ ।

प्रदेश नम्बर ६ :प्रकाश ज्वाला, यमलाल कँडेल, गोरखबहादुर बोगटी

प्रदेश नम्बर ६ मा एमालेका कोही पनि स्थायी कमिटी सदस्य नभएकाले पोलिटव्यूरो सदस्य प्रकाश ज्वाला, प्रदेश सहसंयोजक यमलाल कँडेल र पोलिटव्यूरो सदस्य गोरखबहादुर बोगटी मुख्यमन्त्रीका दाबेदार हुन । स्थानीय तह चुनावमा एमाले दुई सिटले मात्र यो प्रदेशमा पहिलो पार्टी बनेको छ । यो प्रदेशमा माओवादी पनि तुलनात्मक रुपमा राम्रो अबस्थामा रहेको छ ।

प्रदेश नम्बर ७ : कर्णबहादुर थापा, भानुभक्त जोशी, गणेश ठगुन्ना

सात नम्बर प्रदेशको भावी मुख्यमन्त्रीमा पोलिटब्यूरो सदस्य कर्णबहादुर थापा र पूर्वमन्त्री भानुभक्त जोशीको नाम चर्चामा छ । उपाध्यक्ष भीम रावललाई पनि ७ नम्बर प्रदेशको मुख्यमन्त्रीको दाबेदारको रुपका रुपमा हेरिएको छ । तर रावलले आफू निकटकालाई प्रदेशमा नजाने प्रतिनिधिसभामा चुनाव लड्ने बताइसक्नुभएको छ । रावल नगएपछि सात नम्बर प्रदेशमा कर्णबहादुर थापा, भानुभक्त जोशी, गणेश ठगुन्नामध्ये एक जना मुख्यमन्त्रीको उम्मेदवार बन्नेछन् ।