कांग्रेसबाट मुख्य मन्त्रीका सम्भावित उम्मेदवारहरु
काठमाडौं – स्थानीय तह चुनाव सकिन नभ्याउँदै प्रतिनिधिसभा र प्रदेशसभा चुनावको तयारी सुरु भैसकेको छ । चुनाव मंसिर १० र २१ गतेका लागि तोकिएको छ ।
आउँदो मंसिर १० र २१ गते हुने प्रतिनिधिसभा र प्रदेशसभा चुनावका लागि नेपाली कांग्रेसमा सम्भावित उम्मेदवारको औपचारिक रुपमा नै खोजी हुन थालेको छ । मुख्य मन्त्रीका लागि कांग्रेसमा चर्चा भएका नामहरु
प्रदेश नम्बर १ : विश्वप्रकाश शर्मा, अमृत अर्याल
प्रदेश १ मा विश्वप्रकाश शर्मालाई मुख्य मन्त्रीको दावेदारको रुपमा हेरिएको छ । अघिल्लो संविधानसभामा उहाँ पराजित हुनुभएको थियो । १३ औं महाधिवेशनबाट केन्द्रीय सदस्य चुनिनुभएका शर्मा प्रदेश १ का चर्चित युवा नेता हुनुहुन्छ । यस्तै मोरङका चर्चित नेता अमृत अर्याललाई पनि सम्भावित उम्मेदवारको रुपमा हेरिएको छ ।
प्रदेश नम्बर २ :आनन्द ढुंगाना, फरमुल्लाह मन्सुर, महेन्द्र यादव
प्रदेश २ मा स्थानीय तह चुनावको मतगणना चलिरहेकाले मुख्यमन्त्रीको दाबेदारबारे खासै छलफल भएको छैन । तर केन्द्रीय सदस्यहरु आनन्द ढुंगाना, फरमुल्लाह मन्सुर, महेन्द्र यादव लगायतका नेताहरुलाई सम्भावित उम्मेदवारका रुपमा हेरिएको छ ।
प्रदेश नम्बर ३ : गगन थापा, रवि जोशी
स्रोतका अनुसार युवा नेता गगन थापाले प्रदेश नम्बर ३ को मुख्यमन्त्रीको उम्मेदवार दाबी गर्नुभएको छ । पूर्व स्वास्थ्यमन्त्री समेत रहेका थापा काठमाडौं निर्वाचन क्षेत्र नम्बर ४ का निर्वाचित सांसद हुनुहुन्छ । तर, मुख्यमन्त्रीको उम्मेदवार हुने शर्तमा प्रदेशसभामा जान थापा तयार हुनुभएको छ ।
प्रदेश नम्बर ४ :धनराज गुरुङ, शंकर भण्डारी, धु्रव वाग्ले
प्रदेश ४ मा धनराज गुरुङ, शंकर भण्डारी, धु्रव वाग्ले लगायतका युवा नेता मुख्यमन्त्री उम्मेदवारको चर्चामा छन् । स्थानीय तहको मत परिणामलाई हेर्दा प्रदेश ४ कांग्रेसका लागि अनुकूल देखिएको छ ।
प्रदेश नम्बर ५ : बालकृष्ण खाँण, चन्द्र भण्डारी, देवेन्द्रराज कँडेल
प्रदेश ५ का लागि कांग्रेसमा मुख्यमन्त्रीको उम्मेदवारका मुख्य दावेदार बालकृष्ण खाँण हुनुहुन्छ । रुपन्देही ३ बाट प्रत्यक्ष निर्वाचित सांसद खाँण मुख्यमन्त्रीको उम्मेदवार हुने गरी प्रदेशमा जान तयार देखिनुभएको हो । स्रोतका अनुसार पूर्वमन्त्री समेत रहेका खाणले अनौपचारिक छलफल समेत थाल्नुभएको छ । चन्द्र भण्डारी, देवेन्द्रराज कँडेललाई पनि सम्भावित उम्मेदवारको रुपमा चर्चा गरिएको छ ।
प्रदेश नम्बर ६ : जीवनबहादुर शाही, हृदयराम थानी
प्रदेश ६ मा कांग्रेस नेता जीवनबहादुर शाही मुख्यमन्त्रीका दाबेदार हुनुहुन्छ । तर, सुर्खेतका हृदयराम थानीलाई पनि सम्भावित उम्मेदवारका रुपमा हेरिएको छ । स्थानीय चुनावमा यो प्रदेशमा कांग्रेस, एमाले र माओवादीले झण्डै बराबर तह जितेका छन ।
प्रदेश नम्बर ७ :रमेश लेखक, वीरबहादुर बलायर
प्रदेश ७ मा रमेश लेखक सम्भावित उम्मेदवार हुनुहुन्छ । उहाँ मुख्यमन्त्रीको उम्मेदवार बन्न तयार हुँदा पार्टीभित्र सर्वसम्मत हुनेछ । तर केन्द्रीय राजनीतिमा स्थापित भइसकेका उहाँ प्रदेशमा जाने या नजाने निश्चित छैन । उहाँको विकल्पको रुपमा भौतिक पूर्वाधारमन्त्री वीरबहादुर बलायर हुन सक्ने कांग्रेसका एक नेताले जानकारी दिए । प्रदेश नंं. ७ मा कांग्रेस बलियो छ ।