मिस ग्य्राण्ड इन्टरनेशनलमा सहभागी हुन जीनस लामा तामाङ भियतनाम जाने
काठमाडौं ५ असोज– मिस ग्य्राण्ड इन्टरनेशनल प्रतियोगितामा सहभागी हुन जीनस लामा भियतनाम जाने भएकी छिन् । अक्टोबर २६ मा हुनलागेको उक्त प्रतियोगितामा बुद्धको शान्तिको सन्देश लिएर सहभागी हुन लागेको उनले जानकारी दिइन् ।
गतवर्ष मिस ग्य्राण्ड नेपाल बन्न सफल जीनस भियतनाममा हुने मिस ग्य्राण्ड इन्टरनेसनलमा नेपालबाट प्रतिनिधित्व गर्ने तयारीमा जुटेकी हुन् । प्रतियोगितामा विश्वका एकसय १० देशका सुन्दरीहरु सहभागी हुनेछन् ।
‘हिंसा र युद्ध रोकौं’ भन्ने मुल नारा लिएर प्रतियोगितामा सहभागी हुन लागेको उनले लोकान्तरलाई बताइन् । उनले भनिन् ‘अहिलेका युवाहरु युद्ध होइन शान्ति र विकास चाहन्छन् ।’
चितवन रामपुरमा जन्मेकी जीनसले चितवनको ग्राण्डी इङलिस बोर्डिङ स्कुलबाट एसएलसी गरेकी हुन् । उनले उच्च माध्यमिक शिक्षा काठमाडौंको हिमालयन ह्वाइट हाउस कलेजबाट लिइन् । उनी अहिले ह्वाइट हाउसमै पत्रकारिता र राजनीतिशास्त्रमा स्नातक गरिरहेकी छिन् ।
मिस ग्य्राण्ड इन्टरनेशनलमा सहभागी हुन पाएकोमा उनी उत्साही र आत्मविश्वासी देखिएकी छिन् । ‘म अत्यन्त उत्साहित छु, देशको नाम राख्ने कोशिस गर्नेछु’ उनले भनिन् ।
‘मिस ग्रान्ड नेपाल–२०१६’ को उपाधि जिनस लामा तामाङले जितेकी थिईन्
अमेरिकाको लस भेगसमा गतबर्ष भएको मिस ग्य्राण्ड इन्टरनेसनलमा सहभागी हुन नपाएकी जीनसलाई आयोजकले यस वर्ष नेपालका तर्फबाट प्रतिनिधित्व गराउन लागेको हो ।
‘गतबर्ष सहभागी हुन नपाएपनि यसबर्ष शान्तिको सन्देश लिएर मिस ग्य्राण्डमा सहभागी हुँदैछु, सम्पूर्ण नेपालीहरुबाट सहयोगको अपेक्षा राखेकी छु’ उनले भनिन् ।
‘मिस ग्य्राण्ड इन्टरनेशनलको अनलाइन भोटिङ केही दिनमै शुरु हुदैछ’ उनले भनिन् । यस प्रतियोगितामा नेपालीको तर्फबाट सहयोग मिल्ने आशा राखेकी छिन् उनले ।
