उत्तर कोरियाले आइतबार हाईड्रोजन बमको सफल परीक्षण गरेको छ। उत्तर कोरियाले परीक्षण गरेको उक्त बम मिसाइलमा समेत लोड गर्न मिल्ने दाबी गरेको थियो।

उत्तर कोरियाले हाईड्रोजन बम परिक्षण गरेलगत्तै दक्षिण कोरियाको सुरक्षा परिषद्ले आपतकालिन बैठक बोलाएको थियो।दक्षिण कोरियाको सरकारी समाचार एजेन्सीका अनुसार उत्तर कोरियाले परिक्षण गरेको परमाणु बम जापानको नागासाकी शहरमा सन् १९४५ मा अमेरिकाले खसालेको बम भन्दा चार पाँच गुणा बढी शक्तिशाली मानिएको छ।

दक्षिण कोरियाका रक्षा मामिलाका संसदिय समितिका प्रमुख किम यङ वूले आज परीक्षण गरेको परमाणु बम यसअघि परिक्षण गरेका पाँच परमाणु भन्दा निकै शक्तिशाली भएको बताए। २०१६ डिसेम्बरमा गरिएको परीक्षणबाट दश किलोटन उर्जा उत्पन्न भएको थियो।

उत्तर कोरियाले यसअघि सन् २००६, २००९, २०१३ र २०१६ मा परमाणु बम परिक्षण गरिसकेको छ।

आज उत्तर कोरियाले परिक्षण गरेको परमाणु बमका कारण भूकम्पको धक्का समेत महशुस गरिएको थियो। अमेरिकी भूगर्भ विभाग केन्द्रले सुरुमा भूकम्प ५ दशमलव ६ रेक्टरको बताए थियो । तर पछि त्यसलाई बढाएर ६ दशमलव ३ रेक्टरको भूकम्पको मापन गरेको थियो। भूकम्पको धक्का जापानमा पनि महशुस गरिएको बताइएको छ। @ बीबीसी ।