काठमाडौं। जम्बो मन्त्रिपरिषद गठन गरेर यसअघि नै विवादमा आएका प्रधानमन्त्री शेरबहादुर देउवाले पुन जम्बो मन्त्रिपरिषद बनाएका छन्। देउवाले मंगलबार नेपाली कांग्रेसका १२ र लोकतान्त्रिक फोरमका तीनसहित १५ राज्यमन्त्री नियुक्त गर्दै जम्बो मन्त्रिपरिषद गठन गरेका हुन्।

माओवादी केन्द्र, लोकतान्त्रिक फोरमसहित साना दलको समर्थनमा प्रधानमन्त्री बनेका देउवाले मुलुकमा गणतन्त्र आएपछिको सबै भन्दा ठूलो मन्त्रिपरिषद विस्तार गरेका हुन्।

गणतन्त्र आएपछि बाबुराम भट्टराईले ४९ सदस्यीय मन्त्रिपरिषद गठन गरेका थिए। यसअघि देउवाले ५२ सदस्यीय मन्त्रिपरिषद बनाएका थिए। यसरी थपिएका राज्यमन्त्रीसहित देउवा नेतृत्वको सरकारको संख्या ४९ पुगेको छ।

प्रधानमन्त्री देउवाले तेस्रो पटक सरकार विस्तार गरेपनि मन्त्रिपरिषदले अझै पूर्णता भने पाएको छैन। अहिले उद्योग, वन तथा भूसंरक्षण, विज्ञान तथा प्रविधि र शान्ति तथा पुर्ननिर्माण गरी चार मन्त्रालय मन्त्री विहीन छन्।

ती मन्त्रालय प्रधानमन्त्री आफैंले राखेका छन्। सरकारलाई समर्थन गरेका साना दल र राप्रपालाई सरकारमा सहभागी गराउन ती मन्त्रालय खाली राखिएको स्रोतले जनाएको छ । यद्यपी राप्रपा भने सरकारमा सहभागी नहुने भइसकेको छ भने राप्रपाबाट विभाजन भइ बनेको राप्रपा प्रजातान्त्रिक भने सरकारमा सहभागी हुने सुरुमा रहेको छ।

यी हुन आज नियुक्त भएका राज्यमन्त्रीहरु
सीता गुरुङ, भौतिक पूर्वाधार तथा यातायात

सरिता प्रसाईं, कृषि विकास

शेषनाथ अधिकारी, शिक्षा

नरबहादुर चन्द वाणिज्य

अब्दुल रज्जाकदी, खानेपानी तथा सरसफाइ

तप्तबहादुर विष्ट, सूचना तथा सञ्चार

अमरसिंह पुन, सिँचाइ

दिलमान पाख्रिन, कानून, न्याय तथा संसदीय मामिला

उदयशम्शेर राणा, अर्थ

डिल्लीबहादुर चौधरी, श्रम तथा रोजगार

तेजुलाल चौधरी, युवा तथा खेलकुद

चम्पादेवी खड्का, सहकारी तथा गरिबी निवारण

जनकराज चौधरी संघीय मामिला तथा स्थानीय विकास

सुमित्रा थरूनी, संस्कृति, पर्यटन तथा नागरिक उड्डयन
यशोदाकुमारी लामा, भूमिसुधार तथा व्यवस्था