काठमाडौं। संविधान संशोधन विधेयक संसदबाट अस्वीकृत भएसँगै राष्ट्रिय जनता पार्टी दई नम्बर प्रदेशमा हुने स्थानीय तहको निर्वाचनमा सहभागी हुने भएको छ। सोमबार संविधान संशोधन प्रस्ताव संसदमा अस्वीकृत भएको थियो।

यसअघि संशोधन विधेयकलाई प्रक्रियामा लैजान सहमत भएको राजपाले त्यसको परिणामलाई स्वीकार गर्ने निर्णय गरेको थियो। ‘चुनावमा भाग लिएपछि त्यसको परीणामलाई सबैले स्वीकार गर्नुपर्छ,’ राजपा अध्यक्ष मण्डलका सदस्य महेन्द्र राय यादवले डिसी नेपालसँग भने, ‘संशोधन प्रस्ताव फेल भएपनि चुनावमा जाने वातावरण बनेको छ। अब राजपा चुनावमा सहभागी हुन्छ।’
मंगलबार बस्ने राजपा पदाधिकारीको बैठकले चुनावमा सहभागी हुने निर्णय गर्ने यादवले जनाए। राजपाले चुनावमा जाने संकेत गरेपनि निर्वाचन आयोगले चुनाव चिन्ह भने दिएको छैन। राजपाले छाता चुनाव चिन्ह दाबी गरेपनि आयोगले दिएको छैन। छाता चुनाव चिन्ह नपाएपनि यसअघि कै कुनै दलको चुनाव चिन्ह लिएर चुनावमा जाने राजपाको तयारी छ। संविधान कार्यान्वयनकालागि संशोधन विधेयक पारित हुनुपर्ने र त्यसो नभएको अवस्थामा दीर्घकालीन असर पर्ने राजपाको ठहर छ।

यसअघि राजपाभित्र संविधान संशोधन नभएसम्म चुनावमा भाग लिन नहुने भन्ने पक्षको दबदबा थियो। संशोधन नभएसम्म चुनावमा भाग नलिने भन्दै राजपाले दुई नम्बर प्रदेश बाहेकका ६ वटा प्रदेशको स्थानीय तह निर्वाचन बहिष्कार गरेको थियो। लामोसमयसम्म संशोधन विधेयक अड्काएर राख्दा नराम्रो सन्देश जाने भन्दै राजपा संशोधन विधेयक अगाडि बढाउन सहमत भएको थियो।

रापपा सहमहामन्त्री सरेश मण्डलले अहिलेको संरचनाबाट मधेसको समस्या समाधान नहुने र त्यसको विकल्प खोज्ने विषयमा पदाधिकारी बैठकमा छलफल हुने बताए। ‘अहिलेको संसदमा मधेस केन्द्रित दलले प्राप्त गरेको मत केवल ११ प्रतिशत मात्र हो,’ मण्डलले भने, ‘त्यसमा पनि सिट संख्या कम छ। अहिलेकै संरचनाबाट मधेसको समस्या समाधान हुने संभावना नभएकाले त्यसको विकल्पका विषयमा पनि छलफल हुन्छ।’

संविधान संशोधनको विपक्षमा मतदान गरेपनि एमाले र राप्रपासँग आगामी चुनावमा सहकार्य नगर्ने राजपाका नेताहरुले जनाएका छन्। यसअघि राजपा र एमालेबीच चुनावी तालमेल हुने समाचार बाहिर आएका थिए। राजपाले भने पहिलो प्राथमिकता मधेस केन्द्रित दललाई दिने तयारी गरेको छ। चुनावमा फोरम नेपाल पहिलो रोजाइमा पर्ने एक नेताले जनाए।