काठमाडौं। नेपाल आयल निगमले जग्गा किन्दा व्यापक अनियमितता भएको विषयमा व्यवस्थापिका संसद अन्तर्गतको सार्वजनिक लेखा समितिमा छलफल भएको छ। बुधबार बसेको समितिको बैठकमा आपूर्ति मन्त्री, आपूर्ति सचिव, नेपाल आयल निगमका कार्यकारी निर्देशकलगायतका पदाधिकारीलाई समितिमा बोलाइएको थियो।

बैठकको सुरुमा मन्त्री, सचिव, कार्यकारी निर्देशकलगायत निगमका पदाधिकारीले आफ्नो भनाइ राखेका थिए। उनीहरुको भनाइप्रति सांसदहरुले कडा आपत्ति जनाएका छन्।

समिति सदस्य एवं सांसद धनराज गुरुङले तीन करोड पर्ने जग्गा दश करोडमा किनेर निगमले ठूलो आर्थिक हिनामिना गरेको आरोप लगाए। उनले समितिलाई भ्रममा राखेर विचौलीमार्फत सस्तो मुल्यको जग्गालाई बढी मुल्यमा खरिद गरेको भन्दै आपत्ति जनाए। ‘तीन करोड पर्ने जग्गाा दश करोडमा किनेर भ्रष्टाचार गर्ने?,’ गुरुङले भने, ‘सरकारी पैसा बालुवामा पानी खन्याएजस्तो गर्ने अनि केही पनि भएको छैन भन्ने?’
निगमका कार्यकारी निर्देशक गोपाल खड्काप्रति लक्षित गर्दै गुरुङले विचौलियामार्फत जग्गा किनेको र सस्तो दामको जग्गालाई बढी मुल्य तिरेको भन्दै आक्रोश व्यक्त गरे। उनले नेताको घरमा तेल पुर्याएर ठूलो आर्थिक चलखेल गर्न लागेको आरोपसमेत लगाए। गुरुङले निगमले टेण्डरको नाटक गरेर कमिशनको जालझेल गरेको आरोप लगाए।

गुरूङले नेताकाे घरमा तेल पुर्याएर कराेडाैंकाे भ्रष्टाचार गर्न नपाइने बताए। तर कुन नेताकाे घरमा तेल पुर्याएकाे भन्ने कुरा भने खुलाएनन्

समितिका कार्यकारी निर्देशक खड्काले देशमा सधैं हाहाकार भइराखेस भनेर षड्यन्त्र भइरहेको र त्यसैका आधारमा भ्रष्टाचार भएको भन्ने हल्ला चलाएको बताएका थिए। त्यसको जवाफमा गुरुङले जग्गा खरिदमा ठूलो आर्थिक चलखेल गरेको आरोप लगाउँदै गैरजिम्मेवारपूर्ण अभिव्यक्ति नदिन खड्कालाई चेतावनी दिएका थिए।

‘निगमले जग्गा किन्ने क्षेत्रमा जनप्रतिनिधिलाई हामीले टेलिफोनमार्फत जग्गाको मूल्य सोधका छौं,’ उनले भने, ‘हामीले पनि बुझेका छौं। चलनचल्तीको मूल्य भन्दा तेब्बर मूल्यमा खरिद गरी ठूलो आर्थिक चलखेल भएको छ।’

उनले भ्रष्टाचारीको जात, धर्म र दल नहुने भन्दै आयल निगमको जग्गा खरिद प्रकरणमा छानविन गर्नुपर्ने बताए। उनले जिम्मेवार निकायमा बस्ने व्यक्तिले नै लाचारी प्रकट गरेको भन्दै आपत्ति जनाए।