१८ कम्पनीको एफपीओ र आईपीओ आउँदै, किन्ने होइन त सेयर ?
काठमाडौं । पुँजीबजारमा विभिन्न क्षेत्रका डेढ दर्जन कम्पनीले सर्वसाधारणलाई सेयर निष्कासन गर्न लागेका छन् ।
गत असार ३० गतेसम्म बैंक तथा वित्तीय क्षेत्र र जलविद्युत गरी १८ कम्पनीले साधारण सेयर (आईपीओ) र थप सेयर निष्कान (एफपीओ) निष्कासनका लागि धितोपत्र बोर्डमा निवेदन दिएका छन् । सेयर निष्कासन गर्न लागेका १८ मध्ये ११ जलविद्युत कम्पनी रहेका छन् ।
१८ कम्पनीले ५ करोड ६२ लाख ३ हजार ८५ कित्ता आईपीओ र एफपीओ निष्कासन गर्न लागेका हुन् । यी मध्ये ३ अर्ब २९ करोड १४ लाख २९ हजार रुपैयाँ बराबरको ३ करोड २९ लाख १४ हजार कित्ता आईपीओ र १ करोड ७० लाख कित्ता भन्दा बढी एफपीओ निष्कासनका लागि निवेदन परेको धितोपत्र बोर्डले जनाएको छ ।
यस्तै जलविद्युत कम्पनीले आयोजना प्रभावित स्थानिय बासिन्दा र सर्वसाधारणलाई सेयर निष्कासनका लागि वोर्डमा निवेदन दिएका हुन् । पछिल्लो समयमा जलविद्युत आयोजनाले १० प्रतिशत आयोजना प्रभावित स्थानियबासिन्दालाई अनिवार्य सेयर दिनुपर्ने भएपछि यस क्षेत्रको निष्कासन बढेको हो ।
सेयर निष्कासनका लागि बोर्डमा निवेदन दिनेमा आँखुखोला जलविद्युत कम्पनी लिमिटेड रहेको छ । आँखुले आयोजना प्रभावित स्थानियबासिन्दालाई ८ करोड रुपैयाँ बराबरको ८ लाख कित्ता सेयर निष्कासनका लागि निवेदन दिएको छ । गज्र्याङ उपत्यका हाइड्रोपावर लिमिटेडले पनि २ करोड रुपैयाँ बराबरको २ लाख कित्ता सेयर आयोजना प्रभावित स्थानियवासिन्दालाई दिने भएको छ ।
जोशी हाइड्रोपावर डेभलपमेन्ट कम्पनी लिमिटेडले स्थानियबासिन्दालाई ३ करोड ७१ लाख ४० हजार रुपैयाँ बराबरको ३ लाख ७१ हजार कित्ता साधारण सेयर निष्कासन गर्दे छ ।
प्रिमियर इन्स्योरेन्स कम्पनी नेपाल लिमिटेडले ६ लाख ५९ हजार ५६५ कित्ता एफपीओ निष्कासन गर्न लागेको छ । प्रिमियरको एफपीओको मुल्य भने निर्धारण भएको छैन । उसले पुँजी बढाउन एफपीओ निष्कासन गर्न लागेको हो ।
शुभम् पावर लिमिटेडले आयोजना प्रभावित स्थानिय बासिन्दालाई २ करोड रुपैयाँ बराबरको २ लाख कित्ता साधारण सेयर निष्कास गर्न लागेको छ । सपोर्ट माइक्रोफाइनान्स वित्तीय संस्था लिमिटेडले पनि १ करोड ८० लाख रुपैयाँ बराबरको १ लाख ८० हजार कित्ता साधारण सेयर निष्कासन गर्ने भएको छ । यता बुटबल पावर कम्पनी लिमिटेड (बीपीसी) ले पनि ४० लाख ८१ हजार कित्ता एफपीओ निष्कासन गर्ने भएको छ । सान्जेन जलविद्युत कम्पनी लिमिटेडले लगानी वित्तीय संस्थाका कर्मचारीलाई ८७ करोड ६० लाख रुपैयाँ बराबरको ८७ लाख ६० हजार कित्ता सेयर निष्कासन गर्दे छ । यसैगरी रसुवागढी हाइड्रोपावर लिमिटेडले पनि लगानी गर्ने संस्थाका कर्मचारीलाई १ अर्ब ६४ करोड २१ लाख रुपैयाँ बराबरको १ करोड ६४ लाख २१ हजार रुपैयाँको सेयर निष्कास गर्ने भएको छ ।
बैंक अफ काठमाण्डु लुम्बिनी लिमिटेडले पुँजी बढाउन संस्थापक एफपीओ निष्कासन गर्ने भएको छ । बैंकले ६१ लख ५८ हजार कित्ता एफपीओ निष्कासन गर्न वोर्डमा निवेदन दिएको छ ।
पञ्चकन्यामाई हाइड्रोपावर लिमिटेडले आयोजना प्रभावित स्थानियबासिन्दालाई ११ करोड रुपैयाँ बराबरको ११ लाख कित्ता साधारण सेयर निष्कासन गर्देछ । नेपाल ग्रामीण विकास बैंकले पनि पुँजी बढाउन एफपीओ निष्कासन गर्ने भएको छ । बैंकले ९ लाख ७५ हजार कित्ता एफपीओ निष्कास गर्ने भएको छ ।
एनएमबी बैंकले चुक्तापुँजी बढाउन १ करोड १४ लाख १५ हजार १६३ कित्ता एफपीओ निष्कासन गर्न धितोपत्र बोर्डमा निवेदन दिएको छ । उसले चुक्तापूँजी बढाउन एफपीओ निष्कासन गर्न लागेको हो ।
यस्तै राधी विद्युत कम्पनी लिमिटेडले पनि सर्वसाधारणलाई सेयर निष्कासन गर्ने भएको छ । कम्पनीले ७ करोड ६४ लाख ५५ हजार रुपैयाँको साधारण सेयर सर्वसाधारणलाई निष्कासन गर्न लागेको छ । लङघिङ बुद्धपावर कम्पनी नेपाल लिमिटेडले पनि स्थानियबासिन्दालाई ९ करोड ७८ लाख रुपैयाँ बराबरको सेयर निष्कासन गर्नका लागि धितोपत्र बोर्डमा निवेदन दिएका छन् ।
युनिक हाइडेल कम्पनी लिमिटेडले आयोजना प्रभावित स्थानियबासिन्दालाई सेयर निष्कास गर्न लागेको छ । उसले ५ करोड ५५ लाख रुपैयाँ बराबरको सेयर स्थानियबासिन्दालाई निष्कासन गर्न लागेको हो । युनिकले ३ मेगावाटको मिदीमकरापु खोला आयोजना निर्माण गरिरहेको छ ।
यस्तै जलविद्युत आयोजना निर्माण गरिरहेको सिईडीबी हाइड्रोफण्ड लिमिटेडले पनि सर्वसाधारणलाई २२ करोड ८९ लाख ३० हजार रुपैयाँ बराबरको २२ लाख ८९ हजार ३ सय कित्ता साधारण सेयर निष्कासनका लागि बोर्डमा निवेदन दिएको छ । सामुदायिक लघुवित्त वित्तीय संस्था लिमिटेडले ३ करोड रुपैयाँ बराबरको ३ लाख कित्ता साधारण सेयर निष्कासन गर्न लागेको बोर्डले जानकारी दिएको छ ।
