तेलअविव – ह्योल्मो समाज इजरायलको पहलमा ह्योल्मो समाज इजरायल र ठिलेन इन्टरटेनमेन्ट प्रालि नेपालको संयुक्त आयोजनामा दिवा शिशु स्याहार तथा बाल शिक्षा केन्द्र नेपालको सहयोगार्थ सुदर्शन थापा द्वारा निर्मित तथा निर्देशित नेपाली चलचित्र “म यस्तो गित गाउछु” इजरायलमा प्रदर्शन गरिने भएको छ |

तेलअविव शहर स्थित हगना – १३५ बेतबारबार हलमा आउँदो २१ जुलाई २०१७ (शुक्रबार) प्रदर्शन हुने कार्यक्रमको लागि नेपालबाट सोहि चलचित्रका  मुख्य नायिका पूजा शर्मा र ठिलेन इन्टरटेंमेंटका अध्यक्ष तथा मोडल आर्टिस्ट साथै उक्त चलचित्रका प्रवास साखा व्यवस्थापक ठिलेन लामा आउने भएका छन् |

प्रेम कथामा निर्मित चलचित्र ‘म यस्तो गीत गाउँछु’ नेपालमा  यहि असार ३० गते (१४ जुलाई)देखि देशब्यापी प्रदर्शन हुने भएको छ |  चलचित्रमा पल शाह र पूजा शर्मा सँगै सरोज खनाल, रुपा राना लगायत कलाकारहरुको अभिनय रहेको छ भने कविराज गहतराजको नृत्य निर्देशन र संजय लामाको छायाँकन रहेको छ ।

चलचित्र  प्रदर्शनीबाट मुनाफ भएको रकम दिवा शिशु स्याहार तथा बाल शिक्षा केन्द्रलाई हस्तान्तरण गर्ने समाजकी अध्यक्ष पेम्बा डोल्मा ह्योल्मोले तामाङअनलाइनलाई जानकारी दिनु भएको छ |

चलचित्र प्रदर्शनी कार्यक्रमलाई भव्य र सभ्य पारिदिनको साथै केन्द्रका बाल बालिकाहरुको भबिश्य उज्वल र सफल बनाइदिनु हुनको लागि इजरायलमा रहनु भएका समस्त नेपाली दाजुभाइ तथा दिदीबहिनीहरुमा चलचित्र हेर्न उपस्थितको लागि ह्योल्मो समाज इजरायल द्वारा हार्दिक अनुरोधको साथ निमन्त्रणा गरेको छ |