काठमाडौं । कांग्रेस सभापति शेरबहादुर देउवा मंगलबार प्रधानमन्त्री बन्ने भएका छन् । प्रधानमन्त्रीको निर्वाचन प्रक्रिया नरोक्न एमाले सहमत भएसँगै देउवा प्रधानमन्त्री बन्ने पक्का भएको हो । सोमबार बसेको प्रमुख तीन दलको बैठकले संसद्को गतिरोध अन्त्य गर्ने सहमति गरेको हो । संसद् सचिवालय सिंहदरबारमा बसेको बैठकमा सभामुख ओनसरी घर्तीको समेत उपस्थिती रहेको थियो ।

मंगलबार प्रमुख तीन दलका शीर्ष नेताहरुले संसदमा सम्बोधन गरेपछि प्रधानमन्त्रीको निर्वाचन हुने सहमति भएको छ । प्रमुख तीन दलको सहमतिसँगै काँग्रेस सभापति शेरबहादुर देउवालाई प्रधानमन्त्री बन्ने बाटो खुला भएको छ । बैठक पछि बोल्दै नेकपा एमालेका वरिष्ठ नेता झलनाथ खनालले भोलि संसद बैठक अवरोध नहुने बताएका छन् ।

प्रधानमन्त्रीका लागि देउवाको मात्रै उम्मेदवारी परेको छ । प्रधानमन्त्री चयन प्रक्रियालाई नरोक्ने सहमति भएको तीनै दलका नेताहरुले बताएका छन । सत्तारुढ काँग्रेस र माओवादी केन्द्रले पहिलो चरणको निर्वाचनमा अनियमितता भएको स्विकार गरेपछि एमाले संसद बैठकको अवरोध हटाएर प्रधानमन्त्री निर्वाचन प्रक्रिया सुरु गर्न तयार भएको हो ।

दलहरुबीचको सहमति अनुसार मंगलबार संसद बैठक दुई चरणमा सम्पन्न हुनेछ । पहिलो चरणमा प्रमुख दलका शिर्ष नेताहरुले सम्बोधन गर्नेछन । त्यसपछि पुन: बस्ने बैठकले प्रधानमन्त्री चयन गर्नेछ।

बैठकमा प्रमुख तीन दलबीच तीन वटै तहको निर्वाचन सहमतिमै निष्पक्षताका साथ सम्पन्न गर्ने सहमति पनि भएको छ । एमालेले भरतपुर महानगरपालिकामा भएको मतदान विवाद समाधान गर्न माग गर्दै यस अघि संसद बैठक अवरुद्ध पार्दै आएको थियो ।

तर सत्ता पक्षले अव त्यस्तो हुन नदिने प्रतिवद्धता जनाएपछि एमाले संसद बैठक सुचारु गराउन सहमत भएको हो । एमालेले प्रधानमन्त्री देउवाको विपक्षमा मतदान गर्ने पनि स्पष्ट पारेको छ ।