२५ बैशाख, काठमाडौं । एक सहसचिवलाई लिएर मन्त्रिपरिषद बैठकमा मन्त्री र मुख्यसचिवबीच बाझाबाझ भएको छ । झण्डै हात हालाहालको अवस्था आएपछि बैठकको अध्यक्षता गरिरहेका प्रधानमन्त्री प्रचण्डले हस्तक्षेप गरेका छन् ।

सोमबार बसेको मन्त्रिपरिषद् बैठकमा विज्ञान तथा प्रविधिमन्त्री प्रेमबहादुर सिंहले सहसचिव रामआधार साहलाई प्रशासन समूहमा ल्याउन प्रस्ताव गरेका थिए । उनी प्राविधिक समूहका हुन् । उनलाई प्रशासन समूहमा पटक-पटक प्रस्ताव आएपछि मुख्य सचिव सोमलाल सुवेदीले रोक्दै आएका थिए ।
सोमबारको बैठकमा पनि उनले यो प्रस्तावको विरोध गरे । प्राविधिक समूहमा नै जनशक्ति अभाव रहेको भन्दै उनले साहलाई प्रशासन समूहमा ल्याउन नहुने बताए ।

मुख्यसचिव सुवेदीले यसो भनिरहँदा वातावरणमन्त्री सिंहले ‘तपाई चुप लाग्नुस्’ भनेका थिए ।

लगतै सामान्य प्रशासनमन्त्री केशवकुमार बुढाथोकी जंगिए । अंग्रेजीमा बोलेका उनले मुख्यसचिव सुवेदीमाथि व्यक्तिगत रुपमा साहलाई रोकेको आरोप लगाए । पछिल्लो ६/७ महिनादेखि नै साहलाई मुख्यसचिवले रोकेको उनको आरोप थियो ।

तर, मुख्यसचिवले मन्त्रीको आरोपको खण्डन गरे । आफूले सिस्टम जोगाउन खोजेको उनको तर्क थियो ।

एक मन्त्रीले भने, ‘त्यसपछि सबै बोल्न थाले र बाझाबाझको अवस्था सिर्जना भयो । झण्डै हात हालाहालकै अवस्था आएपछि प्रधानमन्त्रीले हस्तक्षेप गर्नुभयो ।’

प्रधानमन्त्री प्रचण्डले मध्यमार्गी बाटोका रुपमा परामर्शका लागि लोकसेवा आयोगमा पठाउने बताए । यसका लागि प्रस्ताव चाहिने मुख्य सचिव सुवेदीले बताए ।

तर, उनको बोली भूईँमा खस्न नपाउँदै सामान्य प्रशासनमन्त्री बुढाथोकीले हातमै बोकेर ल्याएको छु भन्दै दिएका छन् ।

स्रोतका अनुसार सामान्य प्रशासन मन्त्रालयको उक्त प्रस्तावमा मन्त्रालयका सचिवले समेत हस्ताक्षर गर्न मानेका छैनन् । जसका कारण मन्त्री आफैंले हस्ताक्षर गरेका छन् ।

अब सहसचिव साहको समूह परिवर्तन गर्ने कि नगर्ने भन्नेमा लोकसेवा आयोगको परामर्श लिइने एक मन्त्रीले अनलाइनखबरलाई बताए ।

साह अहिले प्राविधिक सेवा समूह अन्तर्गत छन् । यही सेवा समूहबाट सचिवमा पदोन्नती भए विज्ञान तथा प्रविधि, उद्योग, वाणिज्य लगायतका मन्त्रालयमा मात्र काम गर्न पाउँछन् । तर, प्रशासन सेवा समूहमा आउँदा बरिष्ठताका आधारमा चाँडै सचिव बन्ने भएपछि उनले लबिङ थालेका थिए ।

को हुन् सहसचिव साह ?

साह तीनै सहसचिव हुन्, जो विज्ञान तथा प्रविधि मन्त्रालयको सहसचिव रहँदा नै पक्राउ परेका थिए । गत वर्ष प्रहरीले भारतीय नाकाबन्दी रहेका बेला पेट्रोल पम्पमा रिमोट चलाएर ठगी गर्नेहरु पक्राउ गरेको थियो। त्यही क्रममा साह पनि पक्राउ परे ।

साह गुणस्तर तथा नापतौल विभागको प्रमुख पम्पहरूमा डिजिटल प्राविधि सुरु भएको थियो । तर, उनकै मिलेमतोमा पम्पहरुमा रिमोट जडान गरिएको पाएपछि प्रहरीले पक्राउ गरेको थियो ।

उनीविरुद्ध कालोबजारी तथा ठगीको मुद्दा लगाइएको थियो । तर, जिल्ला अदालतबाट सफाइ पाएपछि उनी पुनः जागिरमा फर्किएका छन् । @ अनलाइनखबर |