माओवादीको चयनमा प्रधानन्यायाधीश खिलराज रेग्मी चुनावी सरकार प्रमुख बने । आइजीपी कसलाई बनाउने भन्ने विषयमा सबभन्दा सिनियर थिइन् –डीआइजी पार्वती थापा मगर ।

सरकार पम्रुख खिलराज रेग्मीलाई बाहुन चाहियो, उनले रातारात उपेन्द्रकान्त अर्याललाई आइजीपीमा बढुवा गरेर पार्वती थापा मगरमाथि अन्याय गरे, योभन्दा जघन्य महिला हिंसा के हुनसक्छ ? राज्यले गरेको विभेद, प्रधानन्यायाधीशले गरेको अत्याचारी निर्णय हो यो । पार्वती थापा मगरले ३० वर्षको फौजी जागीरबाट अवकाशै पाइन् ।

उनी भन्छिन्– आदिवासीकी छोरी भएकै कारणले गर्दा मलाई त्यसो गरिएको हो । म रेग्मीको भान्जी भएको भए रेग्मीको नातेदार भएको भए आईजीपी हुन्थेँ । म भन्दा एकवर्ष जुनियर डीआइजीलाई एआइजी बनाएर आइजी बनाइयो । किन ? कारण के? हो, अर्याल पार्वतीभन्दा जागीरमा जुनियर, पढाईमा जुनियर थिए ।

अर्यालसँग एउटा ग्राजुएसन छ, पार्वतीसँग पोष्ट ग्राजुएशन र अरू दुई विषयमा ग्राजुएशन । तालिम र पदीय क्षमतामा पनि अब्बल । तर आदिवासी मगर महिला परेँ, बाहुन परिन । नेपालमा जन्मेर हामी दोस्रो दर्जाको नागरिक भएर बस्नुपर्ने? भन्ने उनको गुनासोको जवाफ राज्यले, व्यवस्थाले दिनुपर्छ कि पर्दैन? यो खिल पल्टेको प्रश्नले लोकतन्त्रलाई गिज्याइरहेको मात्र छैन, आदिवासीलाई आक्रोशित र आन्दोलित पारिरहनेछ । राज्य किन बोल्दैन ?

-गोर्खा एक्सप्रेसबाट