काठमाडौं । म्यावपावर व्यवसायी आशा लामालाई राजदूत नियुक्तिका लागि कांग्रेसकै नेता जिपछिरिङ लामाले सभापति शेरबहादुर देउवालाई दबाब दिएको खुलेको छ ।
कांग्रेस उच्च स्रोतकाअनुसार देउवाका नजिकका मानिने नेता लामाले लामाको पुरानो इतिहास केही नबताई नेपाली कांग्रेसकी समर्थक भएकी भन्दै तिनलाई राजदूत बनाउन निकै प्रयास गरेको थाहा भएको छ ।
सो दबाबमा परेर देउवाले म्यानपावर सञ्चालक आशा लामाको नाम परराष्ट्र मन्त्री डा. प्रकाश शरण महतलाई दिएका थिए । परराष्ट्र मन्त्री महतका निकटतम सुत्रले पनि लामाका लागि देउवाको भन्दा कांग्रेसी नेता जिप छिरिङको बढी दौड भएको थियो  । सबैतिरबाट अत्यन्त ठूलो दबाब र विरोध आएपछि महतलाई सो नाम फिर्ता लिन पनि बुढानिलकण्ठबाट सुझाव आएको पनि स्रोतले बताएको छ ।
पहिलो संविधानसभामा जनमोर्चा नेपालको तर्फबाट काठमाडौं ४ बाट उमेदवार बनेकी र मेनपावर व्यवसायीको चुनावमा एमालेबाट उमेदवार बनेकी आशा लामा कांग्रेस कोटाबाट राजदूतमा सिफारिस भएपछि कांग्रेसभित्र तीव्र विवाद देखिएको थियो । रामचन्द्र पौडेल पक्षधरले उनको विगत औंल्याउँदै तत्काल पुनर्विचार गर्न आग्रह गरेका थिए ।
स्रोतका अनुसार राजदूत सिफारिस हुने दिन बिहान मात्र मन्त्री महतलाई सभापति देउवाले निवासमा बोलाएर कांग्रेस कोटाका ६ मध्ये लामाको नाम पनि थपेर पठाएका थिए ।
“जिपछिरिङ लामाले अडान कसेपछि आशा लामाको नाम शेरबहादुर देउवाले प्रकाशशरण महतलाई दिएका हुन्,” स्रोतले भन्यो, “सभापतिले लिएको अडान फेर्न नसकेपछि परराष्ट्र मन्त्रीले पनि सोही नाम मन्त्रिपरिषदमा लगेका हुन् ।” आशा लामालाई सरकारले संयुक्त अरब इमिरेट्सका लागि राजदूतमा सिफारिस गरेको थियो ।
पहिलो संविधानसभामा समानुपातिकतर्फबाट कांग्रेसको सांसद् बनेका जिप छिरिङ लामा निर्माण व्यवसायी हुन् । कांग्रेस नेता पौडेलको सिफारिसमा परेका डा. जगदिशचन्द्र पोखरेलको नाम हटाएर आशा लामाको नाम युएईको राजदूत सिफारिसमा परेको थियो ।
परराष्ट्र स्रोतले दिएको जानकारी अनुसार मन्त्रालयबाट नभई सत्तारुढ दलहरुको सहमतिमा सोमबारको मन्त्रिपरिषद्ले १४ देशका लागिराजदूत नाम सिफारिस गरेको हो ।
सिफारिस राजदूत मध्ये लामा र मधेसी जनअधिकार फोरम लोकतान्त्रिकका तर्फबाट राजदूत सिफारिस भएकी शर्मिला पराजुली विवादमा तानिएका थिए । पराजुली ओमनका लागि राजदूत सिफारिस भएकी थिइन् ।
लामा र पराजुली म्यानपावर व्यवसायसँग आवद्ध भएकाले विवादमा तानिए । त्यसपछि देउवा र मन्त्री महतले सल्लाह गरेर लामा र पराजुलीको नाम फिर्ता लिने निर्णय गरेको स्रोतले जानकारी दियो । मन्त्री निकट स्रोतका अनुसार गच्छदारसँग पनि सल्लाह गरेर दुई जनाको नाम फिर्ता लिने निर्णय गरिएको थियो ।
परराष्ट्र मन्त्रालयले मन्त्रिपरिषद्को कार्यालयमा सिफारिस राजदूतहरुको नाम पठाउने क्रममा दुई जनाको नपठाउने भएको छ । यता पहिले सहमति दिएका गच्छदारले सोमबार प्रधानमन्त्री पुष्पकमल दाहाललाई भेटेर पराजुलीको नाम नहटाइदिन आग्रह गरेको स्रोतले जानकारी दिएको छ ।@बाह्रखरी