काठमाडौं, फागुन १६– राजदूतको सिफारिसमा परेका तीन जनाको नाम सरकारले संसदीय सुनुवाई समितिमा नपठाउने भएको छ । गएको सोमबार सिफारिसमा परेका युएईका लागि आशा लामा, ओमनका लागि शर्मिला पराजुली ढकाल र कतारका लागि रमेश कोइरालाको नाम फिर्ता लिने भएको हो ।
सिफारिसमा परेका तीनजनाको नामबारे चौतर्फी विरोध भएपछि प्रधानमन्त्री पुष्पकमल दाहल प्रचण्डले यसलाई रोक्न मन्त्रीपरिषदको कार्यालयलाई निर्देशन दिनुभएको उहाँका एक सल्लाहकारले जानकारी दिएका छन् । विवादास्पद नाम रोक्न सत्तारुढ कांग्रेसभित्रैबाट पनि प्रधानमन्त्रीलाई दवाव परेको थियो ।
कांग्रेसको रामचन्द्र पौडेल समूहका नेताले प्रधानमन्त्रीलाई भेटेर तत्काल निर्णय कार्यान्वयन नगर्न दबाब दिएका थिए भने उनीहरुलाई रोक्न माग गर्दै कांग्रेस निकट म्यानपावर व्यवसायी पनि पुगेका थिए । प्रधानमन्त्री श्रोतले भन्यो, ‘विवादित व्यक्तिलाई राजदूत बनाउँदा प्रधानमन्त्री र सरकार मुछिने भएकाले जसले सिफारिस गरेको भएपनि प्रक्रियामा नपठाउन प्रधानमन्त्रीले निर्देशन दिनुभएको हो ।’
परराष्ट्रमन्त्री प्रकाशशरण महत जेनेभाबाट फर्किएपछि उनीहरुको ठाउँमा कसलाई पठाउने भन्ने निर्णय हुने श्रोतको भनाई छ । म्यानपावर सञ्चालक र विवादास्पद छवि भएका व्यक्तिलाई राजदूतमा सिफारिस गरेको भन्दै चौतर्र्फी विरोध भएको थियो ।