स्थानीय चुनावप्रति आदिवासी जनजातीको आपत्ति
काठमाडौ– नेपाल आदिवासी जनजाति महासंघले बैशाख ३१ गते स्थानीय तहको निर्वाचन गर्ने सरकारको निर्णयप्रति आपत्ति जनाएको छ । महासंघले आदिवासी जनजातिहरुको माग सम्बोधन नगरी सरकारले स्थानीय तहको निर्वाचनको मिति घोषणा गरेको भन्दै मान्य नहुने चेतावनी समेत दिएको छ ।
काठमाडौंमा बुधबार पत्रकार सम्मेलन गर्दै महासंघका अध्यक्ष जगतबहादुर बरामले अधुरो, अपूरो र असंवैधानिक तवरले आएको स्थानीय तह पुनर्संरचना आयोगको प्रतिवेदनलाई आधार मानेर सरकारले स्थानीय निर्वाचन गराउन लागेकाले विरोध गर्नुपरेको बताए । महासंघले आफूहरु निर्वाचनको विरोधी नभएको तर स्थानीय तहको संख्या र सीमा निर्धारण गर्दा आदिवासी जनजातिहरुको पहिचान खुल्नुपर्ने आफूहरुको माग रहेको पनि स्पष्ट पारेको छ ।
महासंघले स्थानीय समुदायको पहिचान खुल्ने संवैधानिक व्यवस्था गर्न सरकारलाई दवाव दिँदै आएको छ । स्थानीय तहको संख्या र सिमा निर्धारण गर्दा आफूहरुको पहिचान खुलाउन सरकार तयार नभए अदालत जान बाध्य हुने महासंघद्धारा जारी विज्ञप्तीमा उल्लेख गरिएको छ ।