काठमाडौं, २ फागुन। नेपाल प्रहरीको महानिरीक्षक आफैंले भनेको व्यक्ति नियुक्त गर्न दबाब दिएपछि नेपाली कांग्रेसका सभापति शेरबहादुर देउवा कांग्रेसभित्रै एक्लिँदै गएका छन्।

गृहमन्त्री विमलेन्द्र निधिलाई महानिरीक्षकमा जयबहादुर चन्दलाई नियुक्ती नगरे पदबाट बर्खास्त गर्ने चेतावनी दिएका देउवाले प्रधानमन्त्रीलाईसमेत चन्दलाई महानिरीक्षक नबनाए सरकारलाई दिएको समर्थन फिर्ता लिने चेतावनी दिएका थिए।

कांग्रेसभित्रैका नेताहरुले सरकारमा पार्टीको नेतृत्व गरेका गृहमन्त्रीलाई निर्णय गर्न दिनुपर्ने मध्यममार्गी नेताको आग्रहलाई समेत देउवाले अस्विकार गरेका थिए। ‘उहाँ जसरी पनि पेलेरै जाने मुडमा देखिनु भयो,’ नाम उल्लेख नगर्ने सर्तमा एक कांग्रेस नेताले भने, ‘देउवाजीको हठले उहाँलाई नै हानी गर्दैछ।’

आइतबार बसेको मन्त्रिपरिषद बैठकले नेपाल प्रहरीको २५ औं महानिरीक्षकमा वरियाताक्रममा तीन नम्बरमा रहेका जयबहादुर चन्दलाई नियुक्त गर्ने निर्णय गरेको थियो।

प्रधानमन्त्री र गृहमन्त्री वरियता क्रममा एक नम्बरमा रहेका नवराज सिलवाललाई प्रहरी महानिरीक्षक बनाउनु पर्ने पक्षमा भएपनि देउवाको दबाबका कारण मन्त्रिपरिषद बैठकले चन्दलाई महानिरीक्षक नियुक्त गर्ने निर्णय गरेको थियो।

देउवाको दबाबमा मन्त्रिपरिषदले चन्दलाई महानिरीक्षक नियुक्त गने निर्णय गरेको केही समय पछि नै सर्वोच्च अदालतले चन्दलाई महानिरीक्षक बनाउने निर्णय कार्यान्वयन नगर्न अन्तरिम आदेश जारी गरेको थियो। चन्दलाई महानिरीक्षक बनाउन देउवाले लिएको अडानप्रति देउवा पक्षका कतिपय नेताहरु नै सन्तुष्ट छैनन्।

देउवाका विश्वास पात्र मानिएका र वर्तमान सरकार गठनमा महत्वपूर्ण मानिएका गृहमन्त्री निधि नै देउवासँग रुष्ट छन् भने रक्षा मन्त्री बालकृष्ण खाँडसमेत देउवासँग सन्तुष्ट नभएको एक नेताले बताए। महाधिवेशन भएको एक वर्ष हुन लाग्दासमेत पदाधिकारी नियुक्त गर्न नसकेका देउवाको पौडेल पक्षका नेताले चर्को आलोचना गर्दै आएका छन्।

महानिरीक्षक नियुक्तीमा देउवाले लिएको अडानपछि उनी निकटहरु नै रुष्ट भएपछि देउवा पार्टीभित्र एक्लिन थालेका छन्।

चन्दको पक्षमा देउवाले अडान लिएपछि प्रधानमन्त्रीले त्यसो नगर्न आग्रह गरेका थिए। तर देउवा आफ्नो अडानबाट पछि नहटेपछि प्रधानमन्त्रीले आइतबार विहानै मन्त्रिपरिषद बैठक बोलाएर चन्दलाई महानिरीक्षक नियुक्त गर्ने निर्णय गरेका थिए।

नेपाल प्रहरीको महानिरीक्षकलाई लिएर सरकारको नेतृत्व गरेको दल माओवादी केन्द्र र प्रमुख सत्तासाझेदार नेपाली कांग्रेसबीच दूरी बढेको छ।

स्रोतका अनुसार सर्वोच्च अदालतले महानिरीक्षकमा चन्दको नियुक्ती बदर गर्यो भने त्यसैलाई आधार बनाएर प्रधानमन्त्रीले राजीनमा दिने र एमालेसँग नयाँ गठबन्धन गर्ने तयारी हुन थालेको छ।

उच्च स्रोतका अनुसार केही दिन अघि एमाले सचिव योगेश भट्टराईले प्रधानमन्त्री दाहाललाई भेटी कांग्रेसले समर्थन फिर्ता लिए एमालेले साथ दिने बताएका थिए।

‘तपाइँले हाम्रा दुई नेतालाई प्रधानमन्त्री बनाउनु भएको छ,’ प्रधानमन्त्रीलाई भट्टराईले भनेको भनाइ उद्धृत गर्दै स्रोतले भन्यो, ‘तपाइँको अप्ठ्यारा हामीले बुझेका छौं। कांग्रेसले समर्थन फिर्ता लिए एमालेले सरकारलाई समर्थन गर्छ।’ एमालेले दाहालकै नेतृत्वमा नयाँ सरकार गठन गर्न सकिने गरी माओवादीलाई आश्वस्त पारेको स्रोतको भनाइ छ।

शुक्रबार माओवादी नेता नारायणकाजी श्रेष्ठको निवासमा भएको प्रधानमन्त्री दाहाल र एमालेका अध्यक्ष केपी ओलीबीचको छलफलमा समेत नयाँ सत्तासमिकरणबारे छलफल भएको स्रोतले जनाएको छ।