झापा, १३ पुस – पाँचौँ राष्ट्रिय खेलकुद प्रतियोगिताअन्तर्गत आज सम्पन्न ब्याडमिन्टन पुरुष तथा महिला एकलतर्फको उपाधि क्रमशः नेपाली सेनाका रत्नजित तामाङ र नङशल तामाङले जित्नुभएको छ ।

दुवैजना दिदीभाई हुन् । रत्नजितले नेपाली सेनाकै दिपेश धामीलाई २१–१९ र २१–११ को सोझो सेटमा पराजित गर्दै स्वर्ण पदक जित्नुभएको हो । उक्त स्पर्धामा सुदूरपश्चिमका सञ्जिव खड्का र नेपाल प्रहरीका विष्णु कटुवालले कास्य पदकममा चित्त बुझाउनुभयो । यस्तै महिला एकलतर्फ नङशलले सशस्त्र प्रहरीका शिक्षा श्रेष्ठलाई १७–२१, २१–१२ र २१–१० अङ्कले पराजित गर्दै स्वर्ण पदक जित्नुभएको हो । नेपाली सेनाकै अनुमाया राई र अमिता गिरीले कास्य पदक जित्नुभयो ।

पुरुष डबल्सतर्फ नेपाली सेनाका रत्नजित तामाङ र नविन श्रेष्ठको जोडीले सेनाकै दिपेश धामी र सुरोज महर्जनको जोडीलाई २१–१९, १६–२१ र २१–१६ अङ्कले पराजित गर्दै स्वर्ण पदक जित्नुभयो । नेपाल प्रहरीका विष्णु कटुवाल र दीपक बोहराको जोडी तथा सशस्त्र प्रहरीका जोसेफ अधिकारी र सुमन लिम्बुको जोडीले कास्य पदक जित्नुभयो ।

महिला डब्ल्सतर्फ सशस्त्र प्रहरीका पुजा श्रेष्ठ र शिक्षा श्रेष्ठको जोडीले नेपाली सेनाका मेघा चन्द र अनुमाया राईको जोडीलाई २१–१५ र २१–८ को सोझे सेटमा हराउँदै स्वर्ण पदक जित्नुभयो । यस्तै सेनाका जेसिका गुरुङ र सुनैना मुखिया तथा नङशल तामाङ र अमिता गिरीको जोडीले कास्य पदक जित्नुभयो । मिक्स डबल्सतर्फ सेनाका दीदिभाइको जोडीले नै स्वर्ण पदक जित्नुभयो । दिदी नङशल तामाङ र भाई रत्नजित तामाङको जोडीले सशस्त्र प्रहरीका शिक्षा श्रेष्ठ र सुदीप सेंढाईको जोडीलाई २१–११ र २१–१० को सोझो सेटमा पराजित गर्दै स्वर्ण जित्नुभयो । सशस्त्र प्रहरीका शोभा गौचन र विजित थापा मगर तथा अनुमाया राई र नविन श्रेष्ठको जोडीले कास्यमा चित्त बुझाउनुभयो ।