पुस ७, २०७३- भाषा आयोगले नौ सदस्यीय विज्ञ समूह गठन गरेको छ । समूहमा बैरागी काइँला (तिलविक्रम नेम्बाङ), भाषाशास्त्रीहरू प्रा. योगन्द्रप्रसाद यादव, प्रा. चूडामणि बन्धु, प्रा. नोवलकिशोर राई, प्रा. माधवप्रसाद पोखरेल, प्रा. तेजरत्न कंसाकार, प्रा. जीवेन्द्रदेव गिरी, प्रा. दानराज रेग्मी र प्रा. रुद्रलक्ष्मी श्रेष्ठ छन् ।

आयोगका अध्यक्ष डा. लवदेव अवस्थीले भाषा सेवा तथा भाषाविज्ञानमा लामो समयदेखि योगदान पुर्‍याउँदै आएका विज्ञहरूको समूह गठन गरेको जनाए । समूहमा संलग्नमध्ये बैरागी काइँला नेपाल सरकारले २०५० सालमा गठन गरेको ‘राष्ट्रिय भाषा सुझाव आयोगका संयोजक थिए । त्यसैगरी भाषाशास्त्रीद्वय यादव र राई सोही आयोगका सदस्य थिए । प्रा. गिरी नेपाल प्रज्ञा प्रतिष्ठानका वर्तमान सदस्य सचिव हुन् भने रेग्मी त्रिभुवन विश्वविद्यालय भाषाविज्ञान केन्द्रीय विभाग प्रमुख हुन् ।

संविधानअनुसार आयोगले सरकारी कामकाजको भाषाका रूपमा मान्यता पाउन पूरा गर्नुपर्ने आधार निर्धारण गरी सरकारसमक्ष भाषाको सिफारिस गर्ने, भाषाहरूको संरक्षण, संवद्र्धन र विकासका लागि अवलम्बन गर्नुपर्ने उपाय नेपाल सरकारसमक्ष सिफारिस गर्ने, मातृभाषाको विकासको स्तर मापन गरी शिक्षामा प्रयोगको सम्भाव्यताबारे सरकारसमक्ष सुझाव पेस गर्ने रहेको छ । उक्त उद्देश्य परिपूर्तिका निम्ति विज्ञ समूहले काम गर्ने आयोगका अध्यक्ष अवस्थीले बताए ।

संविधानको धारा २८७ को उपधारा (१) अनुसार सरकारले गत भदौ २४ गते भाषा आयोग गठन गरेपनि हालसम्म प्रदेशहरूको प्रतिनिधित्व हुने गरी आयोगको सदस्य मनोनयन गर्नसकेको छ । ‘विगतमा भएका भाषा नीति, भाषाहरुको अध्ययन अनुसन्धानहरुको सिंहावलोकन र आयोगले पूर्णता पाएलगत्तै कसरी अघि बढ्ने भन्नेबारे मार्गचित्र निर्माण गर्न विज्ञ समूहबाट सहयोग लिइने छ,’अवस्थीले भने ।