संविधान संशोधनमा प्रत्यक्ष निर्वाचित कार्यकारीको प्रावधानलाई थपौ – बाबुराम भट्टराई
पुस ६, २०७३- नयाँ शक्ति पार्टीका संयोजक बाबुराम भट्टराईले प्रत्यक्ष निर्वाचित कार्यकारीको प्रावधानलाई अहिले चलिरहेको संविधान संशोधनको बहसकै क्रममा थप्नुपर्ने बताएका छन् । नयाँ शक्तिको युवा संगठन राष्ट्रिय युवा अभियानले मंगलबार राजधानीमा आयोजना गरेको ‘समृद्धि र स्थायी सरकारका लागि प्रत्यक्ष जननिर्वाचित कार्यकारी प्रमुखको आवश्यकता’ अन्तक्र्रियामा उनले राजनीतिक स्थिरताका लागि अहिलेको शासकीय प्रणाली उपयुक्त नरहेको भन्दै सुधारका लागि सबै दल तयार हुनुपर्ने बताए ।
‘स्थिरता, समृद्धि, स्वाधीनता, सुशासनका लागि प्रत्यक्ष निर्वाचित कार्यकारी प्रमुख चाहिन्छ भन्ने कुरा समयमै सोच्नु आवश्यक छ,’ उनले भने, ‘अहिलेकै संविधान संशोधनका क्रममा शासकीय स्वरूपको यो विषय पनि समावेश गरौं । त्यसले राजनीतिक प्रणालीलाई स्थिर बाटोमा लैजान्छ ।’ अन्तक्र्रियामा कांग्रेस नेता चन्द्र भण्डारीले संसदीय प्रणालीका समस्याबारे चर्चा गर्दै प्रत्यक्ष कार्यकारीको आवश्यकता औंल्याए ।
एमाले केन्द्रीय सदस्य रवीन्द्र अधिकारीले शासकीय प्रणालीको सन्दर्भमा विगतमा गरेको कमजोरी सच्याउन दलहरू तयार हुनुपर्ने बताए । ‘प्रत्यक्ष निर्वाचित कार्यकारीको व्यवस्था गरिएको भए देश अहिलेको यो दुश्चक्रमा फँस्ने थिएन,’ अधिकारीले भने, ‘समानुपातिक निर्वाचनको व्यवस्था भएको संसदमा कसैको पनि बहुमत आउँदैन, त्यसैले यस्तो स्थितिमा संसद्लाई प्रतिनिधित्वको थलो बनाएर प्रत्यक्ष निर्वाचित कार्यकारी प्रमुखले शासन गर्ने व्यवस्था गरौं, त्यसले सन्तुलन पनि कायम हुन्छ भन्ने मान्यता थियो । अन्तिम समयमा सहमति गर्दा देश गलत बाटोमा गयो ।’
कार्यक्रममा माओवादी केन्द्रका नेता गिरिराजमणि पोखरेलले संविधानसभाको शक्ति सन्तुलन हेरेर माओवादीले फरक मतसहित अहिलेको व्यवस्थामा जानु परेको भन्दै स्थिरताका लागि प्रत्यक्ष निर्वाचित कार्यकारीको प्रणालीमै जानुपर्ने बताए । @ इकान्तिपुर |