कुन मन्त्रीको सम्पत्ति कति ?

December 14, 2016

काठमाडौं । सरकार गठन भएको करिब चार महिनापछि प्रधानमन्त्री तथा मन्त्रीहरुले सम्पत्ति विवरण सार्वजनिक गरेका छन् । सरकार बनेको चार महिनापछि सार्वजनिक गरिएको विवरणमा प्रधानमन्त्री दाहालले चितवनमा एक कट्ठा र तीन तोला सुन मात्र रहेको उल्लेख गरेका छन् ।

तर उनले सार्वजनिक गरेको सम्पत्ति विवरणलाई लिएर सामाजिक सञ्जालमा भने निकै आलोचना भएको छ । दाहाल नेतृत्वमा रहेका अधिकांश सदस्यको सम्पत्ति भने निकै बढी देखिएको छ । विमलेन्द्र निधि, विक्रम पाण्डे, दिपक बोहोरा, बालकृष्ण खाँण, प्रकाशशरण महत लगायतका मन्त्रीको सम्पत्ति बढी देखिएको छ ।

दाहालले उल्लेख गरेको विवरणअनुसार तीन तोला सुन पनि पैत्रिक सम्पत्ति भएको र एक कट्ठा जमिन समेत श्रीमती सिता दाहालको नाममा रहेको उल्लेख गरेका छन् । चितवनमा रहेको उक्त एक कट्ठा जमिन समेत पैत्रिक सम्पत्ति रहेको उल्लेख गरिएको छ । विवरणअनुसार दाहालले हालसम्म कुनै सम्पत्ति आफ्नो नाममा नराखेको देखिएको छ ।

उनले उल्लेख गरेको विवरणमा नगद रकम कतै देखाएका छैनन् भने कुनै बैंकमा खाता समेत छैन ।

उपप्रधानमन्त्री निधिसँग ६० तोला सुन, २९ लाख बैंक ब्यालेन्स

त्यसैगरी उपप्रधानमन्त्री तथा गृहमन्त्री बिमलेन्द्र निधिले तराईमा लगभग २० विघा पैत्रिक सम्पत्ति रहको उल्लेख गरेका छन् । उनले भक्तपुरको कटुन्जेमा अनामिका उपासक निधिका नाममा १२ लाख ५० हजार रुपैयाँमा किनेको एक रोपनी जग्गा, उनकै नाममा कटुन्जेको छुट्टा छुट्टै कित्ता रहेको १३ लाख ५० हजार मुल्यमा किनिएको ६ आना, ६ लाख ८० हजारमा किनेको ३ आना र बकस प्राप्त ४ आना जग्गा रहेको उल्लेख छ । श्रीमतीको नाममा रहेको जग्गा तलब, भत्ता र कृषि आम्दानीबाट जम्मा गरेको किनेको विवरणमा उल्लेख छ ।
त्यसैगरी उनले विभिन्न बैंकमा गरेर २९ लाख ब्यालेन्स दाईजो उपहार र पेवाका रुपमा प्राप्त ६० तोला सुन तथा १ सय ५० तोला चाँदी रहेको उल्लेख गरेका छन् । उनले २०५४ सालमा किनेको ८ लाख रुपैयामा किनेको निशान गाडी पनि सम्पत्ति विवरणमा उल्लेख गरेका छन् ।

अर्थमन्त्री पनि गरिब

अर्थमन्त्री रहेका कृष्णबहादुर महराको सम्पत्ति प्रधानमन्त्री दाहालको जस्तै थोरै रहेको विवरणमा उल्लेख गरिएको छ । उनले भत्ता र तलब बापत आएको एभरेष्ट बैंकमा ८० हजार रुपैयाँ नगद, गृहजिल्ला रोल्पामा ८ रोपनी पाखो जमिन र दुई तले पुरानो घर भएको विवरण उल्लेख गरेका छन् । सरकारले आज केही राज्यमन्त्रीबाहेक सबै मन्त्रीहरुको सम्पत्ति विवरण सार्वजनिक गरेको छ ।