देश बर्बाद गर्ने सन्धिसम्झौता पहाडी शासकले गर्ने अनि दोष मधेशी जनतालाई किन ? डा. बाबुरामको प्रश्न
नयाँ शक्ति पार्टीका संयोजक डा. बाबुराम भटराईले नेपालमा केही दलको बालहठको कारण राज्य प्रतिगामी दिशातर्फ उन्मुख भइरहेको बताएका छन् ।
वीरगञ्जको गैरसरकारी संस्था सानो पाइलाको १०औं वार्षिक समारोहमा बोल्दै उनले यस्तो बताएका हुन् । उनले संसदमा दर्ता भएको संविधान संशोधन प्रस्ताव अपुरो रहेको दाबी गर्दै मधेसी, जनजाति र विपन्न वर्गको माग नसमेटिई गरिने संशोधनको अर्थ नहुने तर्क गरे।
अपुरो प्रस्तावलाई परिमार्जन गरी चाँडै संशोधन गरी राजनीतिक गतिरोध अन्त्य गर्नुपर्नेमा पनि उनले जोड दिएका छन्।
नेता भट्टराईले राष्ट्रिय पुनःसंरचना आयोगको प्रतिवेदनअनुसार पहाडमा ८ र तराईमा २ राज्य बनाउनुपर्नेमा त्यसो नहुँदा संघियताबारे जटिलता उत्पन्न भएको समेत बताए।
सीमांकनको मुद्दामा बखेडा झिक्ने ओली, देउवा र सिटौला भएको आरोप लगाउँदै देशलाई बर्बाद गर्ने गरी सन्धि सम्झौता पहाडी शासकले गर्ने अनि देश बेच्ने र टुक्रयाउने काममा मधेसी जनता लागेका छन् भन्ने ? भन्दै उनले आक्रोश पोखे ।
