पोखरा : नयाँ शक्ति नेपालका संयोजक डा. बाबुराम भट्टराईले भाषण सुरु गरेको २ मिनेट पनि भएको थिएन । भाषण सुनिरहेको भीडबाट एक युवा उठे र कालोझण्डा देखाए । भट्टराईले उनलाई देखे । अनि भने, ‘विरोध गर्न पाइन्छ ।’ भट्टराईले भाषणलाई निरन्तरता दिए । तर कालो झण्डा देखाउने ती युवालाई ४ जनाले घेरीहाले । उनले तिनीहरुलाई सोधे, ‘मैले विरोध गर्न नपाउने ? ’

खल्लबल्ल भइहाल्यो । अरु सहभागीले उनलाई समात्न खोजेपछि आफ्नो ठाउँबाट भागे । त्यत्तिकैमा उनको जुत्ता फुत्कियो । अनि भीडबाटै कसैले भन्यो, ‘जुत्ता हान्न लागेको रहेछ ।’ कार्यक्रममै सहभागी कांग्रेस, एमाले र माओवादी केन्द्र समर्थित विद्यार्थीले पत्रकारहरुलाई सूचना दिए, ‘बाबुराम भट्टराईलाई जुत्ता प्रहार भयो ।’ पृथ्वीनारायण क्याम्पसमा बिहीबार बाबुरामलाई त्यसरी कालो झण्डा देखाउने सञ्जीव भट्टराईलाई प्रहरीले भीडबाट निकालेर चौकी पु¥याउन नपाउँदै जुत्ता प्रहार भन्ने हल्ला अनलाइनहरुमा समाचार भइसकेको थियो ।

मञ्चदेखि १ सय मिटर पर सञ्जीवले ज्याकेटभित्र लुकाएर ल्याएको झण्डा देखाएका थिए । सँगै उनले बाबुरामविद्धरु लेखिएको हस्तलिखित पम्प्लेट पनि देखाउन भ्याएका थिए । पम्प्लेटमा उनले बाबुराम भट्टराईको नैतिक पतनमा विद्यावारिधि लेखेका थिए । सञ्जीव पृथ्वीनारायण क्याम्पसकै विद्यार्थी हुन् । कैलाली घर भएका उनले नेताहरुप्रति वितृष्णा स्वरुप विरोधमा कालो झण्डा देखाएको बताएका छन् । ‘हामी सबै नेपाली द्वन्द्वपीडित हौं’, उनले भने, ‘जनयुद्धले देशलाई पछाडि धकेल्यो ।’

मञ्चकै अगाडिपट्टि उठेर बाबुराम विरुद्धको पम्प्लेट र कालोझण्डा देखाएपछि सञ्जीवलाई नयाँ शक्तिका विद्यार्थीले समात्न खोजेका थिए । ‘तर उनी भागिहाले र जुत्ता फुत्कियो,’ कार्यक्रमका एक सहभागी सौगात पोखरेलले भने, ‘कालो झण्डा देखाएका हुन्, जुत्ता हानेका होइनन् ।’

स्वयं सञ्जीवले समेत आफूले बाबुरामलाई जुत्ता नहानेको बताएका छन् । बाबुरामलाई मात्रै नभई ठूला नेताहरुलाई आफूले विरोध गर्ने अभियान चलाउन लागेको सुनाए । ‘आज त्यसको सुरुआत गरेको मात्रै हुँ’, उनले संवाददाताहरुसँग भने, ‘बाबुरामलाई जुत्ता हानेको होइन, हान्ने योजना पनि थिएन ।’

नेता बाबुराम भट्टराईले पनि आफूलाई कसैले जुत्ता नहानेको बताएका छन् । काठमाडौं फर्कनुअघि पोखरा विमानस्थलमा पत्रकारहरुसँग कुरा गर्दै उनले कालो झण्डा देखाइएको भने पुष्टि गरे । ‘उहाँले कालो झण्डा देखाउनुभयो’, उनले भने, ‘मैले उहाँलाई कालो झण्डा देखाउन दिनोस्, म आफैंले पनि कालो कोट लगाएको छु, कालो झण्डा देखाउँदैमा केही हुँदैन भनेको थिएँ ।’