काठमाडौं, १५ मंसिर — प्रमुख प्रतिपक्षी दल नेकपा एमालेले संविधान संशोधन विधेयकको विरोधमा बिहीवारदेखि संसदको बैठक अवरुद्ध गर्ने भएको छ । संविधान संशोधन विधेयक दर्तापछिको अवस्थाको समीक्षा गर्न बुधवार बसेको एमाले संसदीय दलको बैठकले संशोधन विधेयकको विरुद्धमा सदन अवरुद्ध गर्ने निर्णय गरेको सांसद चुडामणि जंगली विश्वकर्माले जानकारी दिए ।

संसद् भवन परिसर नयाँ बानेश्वरमा बसेको एमाले संसदीय दलको बैठकले सरकारले मंगलवार संसदमा दर्ता गरेको संविधान संशोधन विधेयकको पक्षमा सडक र सदन आन्दोलन सशक्त बनाउने बताएको छ । संशोधनविरुद्ध सडकमा उत्रिएको जनताको आन्दोलनको नेतृत्व गर्ने एमाले नेताहरूले बताए ।

संविधान संशोधनपछिको परिस्थितिको समीक्षा र पार्टीको भावी रणनीति तय गर्न बुधवार बसेको संसदीय दलको बैठकमा पार्टीका शीर्ष नेताहरूले सरकारले विदेशी शक्तिको इसारामा संविधान संशोधन विधेयक दर्ता गरेको आरोप लगाएका हुन् । जनभावना विपरीत आएको संशोधन असफल बनाउन एमालेले सडक र सदनमा आन्दोलन गर्ने बताएका सांसद विश्वकर्माले जानकारी दिए ।

बैठकको शुरूमै बोलेका एमाले संसदीय दलका उपनेता सुवास नेम्वाङले संशोधन नेपाली जनताको हितको पक्षमा नभएको बताएका थिए । उनले संशोधनविरुद्ध एमालेले सदनमा सशक्त भूमिका खेल्ने बताए ।

उपाध्यक्ष वामदेव गौतमले राष्ट्रियतालाई कमजोर पार्ने, विभाजन गर्ने र दलहरूको बीचको एकता कमजोर बनाउन संशोधन विधेयक आएको दाबी गरे । ‘दलहरूबीचको ध्रुवीकरण फराकिलो बनाउन, विकास र समृद्धि अवरुद्ध गर्न देशी विदेशी शक्तिको मनसायबाट यो संशोधन आएको छ,’ संसदीय दलको बठकमा नेता गौतमले भने, ‘देशविरुद्धको षड्यन्त्रविरुद्ध एमालेले सदन र सडकबाट सशक्त विरोध गर्छ । जनताको आन्दोलनको नेतृत्व एमालेले गर्नेछ ।’

गौतमले प्रचण्ड नेतृत्वको सरकार गठनमा भूमिका खेलेको शक्तिलाई खुशी बनाउन संविधान संशोधन प्रस्ताव ल्याइएको समेत दाबी गरे । अस्वस्थताका कारण संसदीय दलको बैठकमा अध्यक्ष केपी ओली भने उपस्थित हुन सकेनन् । @ लोकान्तर |