मंसिर १३, ताप्लेजुङ: ताप्लेजुङको ओलाङ्चुङगोलामा हिमाली क्षेत्रमा बस्ने शेर्पा जातीहरुले फुटुक पर्व धुमधामका साथ मनाइरहेका छन् ।

हरेक वर्षको मंसिर महिनामा बाला चतुर्दशीको अघिल्लो दिन सुरु भएर औंसी तिथीमा समापन हुने फुटुक पर्व ओलाङ्चुङगोलाको डिकिछ्योलिङ गुम्बामा धुमधामका साथ मनाउने गरिन्छ । फुटुक पर्वमा रमाउन तिव्वतियनहरु समेत ठुलो संख्यामा ओलाङचुङगोलामा आउने गर्छन् । फुटुकलाई तिव्वतियन र नेपाली युवायुवतीका लागि माया साटासाट गर्ने पर्वको रुपमा पनि लिने गरिन्छ । यहि पर्वमा भेला भएर माया साटासाट गरि तिव्वतियन र नेपाली युवायुवतीहरुले विवाह समेत गर्ने परम्परागत चलन रहेको ओलाङ्चुङगोलाका टासी शेर्पा वताउछन् ।

फुटुक पर्वको अवसरमा अहिले ओलाङ्चुङगोलामा रहेको ऐतिहासिक डिकिछ्योलिङ गुम्वालाई वेहुली झै सिंगारिएको छ । यहि गुम्वामा भेला भएर लामाहरुले वाजागाजाका साथ मन्त्र पढ्ने र घिउ र चामलद्धारा निर्मित विभिन्न देवी देवताका मुर्ती वनाएर पुजा गर्ने गर्छन् । भएभरका प्रसाद, फलफुल र रोटी वनाएर देवी देवतालाई चढाई तीन दिन सम्म यो पर्व मनाइने गरेको पनि टासीले वताए ।

ओलाङ्चुङगोलामा मनाइने फुटुक पर्वको मख्य आकर्षण भनेको लामाहरुको झाँकी हो । यस पर्वमा भुतप्रेत भगाउन चराचुरुङ्गी र जीवजन्तुका आकृतीहरु वनाएर लामाहरुले मखुन्डो लगाई डरलाग्दा झाँकीहरु प्रस्तुत गर्ने गछन् । भुत प्रेत भगाउने मन्त्र मुख्य लामाले पढेपछि अन्य लामाहरुवाट मन्त्रले भनेअनुसारको खुँडा,खुकुरी र भाला लिएर भुतप्रेतलाई मारेको,काटेको र लखेटेको अभिनय गर्दै रोमाञ्चक नृत्य प्रस्तुत गर्ने गरिन्छ । त्यसो गर्नाले वर्षभरी भुतप्रेत भाग्ने,र सुख शान्ती र प्रगती हुने शेर्पा जातीहरुको विश्वास छ । हिमाली शेर्पा जातीहरुले हिन्दुहरुले दशैं जस्तै ठुलो चाडका रुपमा मनाइने फुटुक पर्वमा नयाँ लुगा लगाउने र मिठो मसिनो खाने चलन रहेको छ ।

फुटुकमा स्थानिय शेर्पा जातीहरुले पितृहरु र दिवंगत आफन्तहरुको सम्झना गर्दै मृतकको आत्माले शान्ती पाओस् भनेर दान दक्षिणा समेत गर्ने गर्छन् । दान,दक्षिणाको रुपमा लुगाफाटा,सुनचाँदी र रुपैंयापैसा चढाउने चलन रहेको ओलाङचुङगोलाका छेतेनटासी शेर्पाले वताए । उनका अनुसार हाल ओलाङ्चुङगोला देखी वाहिर रहेकाहरुले पनि मृतक आफन्तको सम्झनामा दान दक्षिणाको रुपमा सुनचाँदी र रुपैंयापैसा पठाउने चलन छ । जम्मा भएका सवै सामग्रीहरु नगद र जिन्सी छुट्याएर स्थानिय डिकिछ्योलिङ गुम्वामा चढाउने गरिएको उनको भनाई छ ।

वर्षमा एक पटक मनाइने फुटुकमा रमाउन ताप्लेजुङ्को लेलेप,तापेथोक,लुङथुङ,घुन्सा,फले सहित काठमाडौं र दार्जेजिङवाट समेत मानिसहरुको ओलाङ्चुङगोलामा वर्षेनी घुइचो लाग्ने गर्छ । ताप्लेजुङवाट तीन दिनको पैदलयात्रा तय गर्दा मात्र पुगिने ओलाङचुङगोला नेपालकै विकट र दुर्गम गाविस मानिन्छ ।