काठमाडौं । पार्टी एकताको तयारीमा रहेका दुई दल नयाँ शक्ति पार्टी नेपाल र संघीय समाजवादी फोरम नेपाल  बीच मोर्चाबन्दी भएको छ । संविधान संशोधनको विषयलाई लिएर दुई पार्टीबीच मोर्चाबन्दि भएको हो । नयाँ शक्तिका संयोजक डाक्टर बाबुराम भट्टराई र फोरम नेपालका अध्यक्ष उपेन्द्र यादवले संविधान संशोधनका विषयमा संयुक्त वक्तव्य जारी गरेका हुन् ।

वक्तब्यमा असन्तुष्ट पक्षहरुको माग सम्बोधन गर्नका लागि आवश्यक संविधान  संशोधनका बुँदाहरु उल्लेख गरिएको छ ।

संशोधनले राष्ट्रिय पहिचानको मान्यता, अधिकार सहितको संघीयता, पूर्ण समानुपातिक प्रतिनिधित्व हुने संसद, प्रत्यक्ष निर्वा्चित कार्यकारी राष्ट्रपति, प्रादेशिक अधिकार क्षेत्रभित्र स्थानीय तह र विशेष संरचना रहने व्यवस्था लगायतलाई सम्बोधन गर्नु पर्ने वक्तव्यमा उल्ल्ेख छ ।

वक्तव्यमा भनिएको छ–‘मधेशी, थारु, आदिवासी जनजाति, खस, मुस्लिम, शिल्पी (दलित), उत्पीडित, उपेक्षित र अल्पसंख्यक समुदाय तथा पिछडिएका क्षेत्र लगायतका समस्याहरुलाई सम्बोधन गर्न संयुक्त लोकतान्त्रिक मधसी मोर्चा, आदिवासी जनजाति राष्ट्रिय आन्दोलन, पहिचानमा आधारित गठबन्धन, संयुक्त प्रादेशिक मोर्चाहरु समेत सम्मिलित संघीय गठबन्धनले उठाएका राष्ट्रिय मुद्दाहरु खासगरी – राष्ट्रिय पहिचानको मान्यता, अधिकारसहितको संघीयता, पूर्ण समानुपातिक प्रतिनिधित्व हुने संसद्, जनताद्वारा प्रत्यक्ष निर्वाचित कार्यकारी राष्ट्रपति, राज्यका सबै अंगमा समानुपातिक समावेशीकरण बहुभाषिक नीति, स्वायत्तता तथा स्वशासन, संघीय न्यायपालिका, प्रादेशिक क्षेत्राधिकारभित्र स्थानीय तह तथा विशेष संरचनाहरु रहने व्यवस्था, सामाजिक न्याय र समानताको अधिकार सहित सबैखाले विभेदको अन्त्य हुने गरी नेपालको संविधानलाई संशोधनद्वारा सच्याउनु पर्दछ ।’

साथै उल्लेखित मुद्दाहरुको सम्बोधन नै नहुने गरी गरिने संशोधनले समस्या समाधान हुन नसक्ने मात्रै नभइ संविधानको स्वीकारेक्ति र कार्यान्वयन पनि हुन नसक्ने संयुक्त वक्तव्यमा उल्लेख गरिएको छ । नयाँ शक्ति र फेरम नेपालबीच गठबन्धन कायम गर्दै अघि बढ्ने र कालन्तरमा पार्टी एकत गर्ने तयारी रहेकाे छ ।